الماتى وبلىسىندا مۇعالىم مەن ونىڭ اكەسى سوققىعا جىعىلدى
قونايەۆ. KAZINFORM - الماتى وبلىسى، قاراساي اۋدانىندا مۇعالىمگە بۇرىنعى كۇيەۋى شابۋىل جاساپ، جۇدىرىقتاعان. جابىرلەنۋشى ءبىر جىل بۇرىن كۇيەۋىمەن زاڭدى تۇردە اجىراسقان.

بۇل تۋرالى ءماجىلىس دەپۋتاتى يرينا سميرنوۆا الەۋمەتتىك جەلىدەگى پاراقشاسىندا جازدى.
ونىڭ سوزىنشە، ەكس-ارىپتەسىنىڭ بۇرىنعى كۇيەۋى ءۇيدىڭ قاقپاسىن سىندىرىپ، ەسىكتى كۇشپەن اشىپ كىرگەن. ول ينسۋلت العان ناۋقاس اكەسىن ءتورت ساعات بويى بايلاپ، قورلاپ، كەيىن ۇيگە كەلگەن بۇرىنعى جۇبايى مەن ونىمەن بىرگە ەرىپ كەلگەن تانىسىنا شابۋىل جاساعان.
- ايەلدىڭ ءىشى مەن كەۋدەسىنە بىرنەشە جاراقات سالىنعان، اكەسى قاتتى سوققىعا جىعىلعان، ال ۇيدە بولعان ءۇشىنشى ادام باس سۇيەك-مي جاراقاتىن الدى. بۇل - ونىڭ العاشقى شابۋىلى ەمەس. بۇعان دەيىن دە ول ۇيگە ۇرلانىپ كىرىپ، دۇنيەلەرىن قيراتىپ، كولىككە زاقىم كەلتىرگەن، بۇرىنعى ايەلىن قورقىتۋ ماقساتىندا ءتۇرلى ارەكەتتەرگە بارعان. جابىرلەنۋشى بىرنەشە مارتە پوليتسياعا ارىز ءتۇسىرىپ، قورعاۋدى سۇراعانىمەن، ەش ناتيجە بولماعان، - دەپ جازدى يرينا سميرنوۆا.
وسى جاعدايعا قاتىستى الماتى وبلىستىق پوليتسيا دەپارتامەنتىنىڭ باسپا ءسوز قىزمەتى كۇدىكتىگە قاتىستى ءىس قوزعالعانىن مالىمدەدى.
- 17-قاڭتار تۇنگى ساعات 00:25 تە قاراساي اۋدانىنىڭ پوليتسياسىنا شامالعان اۋىلىنىڭ 67 جاستاعى تۇرعىنى بۇرىنعى كۇيەۋ بالاسى تۋىنداعان جانجال كەزىندە وعان جانە ونىڭ قىزىنا دەنە جاراقاتىن سالعانى تۋرالى ارىز ءتۇسىردى. بۇل فاكت اۋداندىق پوليتسيادا تىركەلدى. جەدەل-ىزدەستىرۋ ءىس-شارالارى بارىسىندا 57 جاستاعى ەر ادام ۇستالدى، - دەپ حابارلادى پوليتسيادان.
ۆەدومستۆودان اتاپ وتكەندەي، قازىر بارلىق قاجەتتى تەرگەۋ ارەكەتتەرى جۇرگىزىلىپ جاتىر.
ولاردىڭ ناتيجەلەرى بويىنشا وقيعاعا قۇقىقتىق باعا بەرىلەدى. وزگە اقپارات ق ر ق پ ك- ءنىڭ 201-بابىنا ساي جاريا ەتۋگە جاتپايدى.
13-قاڭتار كۇنى اقتوبە قالاسىندا بەلگىسىز بىرەۋ قىزدى جانە ونىڭ اتا-اناسىن كەپىلگە العانىن حابارلاعان ەدىك.
كەيىن كەپىلگە الىنعان ۇيدەن ەكى ادام قايتىس بولدى.