الماتى وبلىسىندا ەكى سۋديا پارا الدى دەگەن كۇدىككە ءىلىندى
الماتى وبلىسى تالعار اۋداندىق سوتىنىڭ ەكى سۋدياسى سىبايلاس جەمقورلىققا قاتىسى بار دەگەن كۇدىكپەن ۇستالدى، دەپ حابارلايدى Kazinform.

رەداكسيامىزعا بەلگىلى بولعانداي، وسى جىلدىڭ تامىز ايىندا تالعار اۋداندىق سوتىنىڭ ەكى سۋدياسىنا قىلمىستىق ءىس قوزعالعان.
ولار ەلىمىزدىڭ كوشى-قون زاڭناماسىن بۇزعان شەتەل ازاماتىنان پارا الدى دەگەن كۇدىككە ءىلىندى.
سۋديالاردىڭ بىرىنە بەيمالىم تۇلعا وزىنە قاتىستى قوزعالعان اكىمشىلىك ءىستى قاراعاندا ەلدەن شىعارىپ جىبەرمەيتىندەي، ايىپپۇل تۇرىندە جازا تاعايىنداۋعا كومەكتەسۋىن وتىنگەن.
وسى شەشىم ءۇشىن ول 30 مىڭ تەڭگە ۇسىنعان.
ءوز كەزەگىندە سۋديا ارىپتەسىنە جۇگىنگەن. قازىرگى ۋاقىتتا تەرگەۋ امالدارى ءجۇرىپ جاتىر.
ق ر سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى بۇل اقپاراتتى رەسمي راستامادى، الايدا جوققا دا شىعارمادى.
«كونستيتۋتسيانىڭ 77-بابىنىڭ 3-تارماعىنىڭ 1-تارماقشاسىنا سايكەس «سۋديا سوت تورەلىگىن جۇزەگە اسىرۋ كەزىندە تاۋەلسىز جانە تەك كونستيتۋتسياعا عانا باعىنادى». سونداي-اق زاڭعا جانە قىلمىستىق-پروتسەستىك كودەكسىنىڭ 19-بابىنىڭ 1-بولىگى «كىناسىزدىك پرەزۋمپتسياسى» بويىنشا زاڭدى كۇشىنە ەنگەن سوت ۇكىمىمەن قىلمىس جاساعانى ءۇشىن كىنالى دەپ تانىلعانعا دەيىن ءار ادام كىناسىز سانالادى»، - دەپ اتاپ ءوتتى الماتى وبلىسى بويىنشا انتيكوردىڭ باسپا ءسوز قىزمەتىنەن.
الماتى وبلىستىق سوتىنىڭ باسپا ءسوز قىزمەتى سۋديالار جۇمىستا دەپ قىسقا عانا جاۋاپ بەردى.
Kazinform رەداكسياسى ق ر سىبايلاس جەمقورلىققا قارسى ءىس-قيمىل اگەنتتىگىنە رەسمي ساۋال جولدادى.