الماتى وبلىسىندا جول اپاتىنان 3 ادام قازا تاپتى
قونايەۆ. KAZINFORM - الماتى وبلىسىندا جول اپاتىنان ءۇش ادام كوز جۇمدى. جانتۇرشىگەرلىك وقيعانىڭ ۆيدەوسى الەۋمەتتىك جەلىدە تارادى.
الماتى وبلىستىق پوليتسيا دەپارتامەنتىنىڭ مالىمەتىنشە، ءۇش ادامنىڭ ءومىرىن قيعان اپات 8-مامىر كۇنى الماتى- كوكپەك- كوكتال اۆتوجولىنىڭ 41 شاقىرىمىندا بولدى.
«Mitsubishi Lancer جۇرگىزۋشىسى رۋلگە يە بولماي، قارسى قوزعالىس جولاعىنا شىعىپ، Nissan Cefiro كولىگىمەن سوقتىعىسقان. ال، ينەرتسيا بويىنشا Nissan Cefiro جولدىڭ شەتىندە تۇرعان Mitsubishi Pajero Sport پەن BMW X5 كولىكتەرىنە سوعىلدى. وقيعا ورنىندا Nissan Cefiro جۇرگىزۋشىسى، Mitsubishi Lancer جۇرگىزۋشىسى جانە ونىڭ جولاۋشىسى قازا تاپتى»، - دەپ حابارالادى ۆەدومستۆودان.
جول اپاتى فاكتىسى بويىنشا قاجەتتى ساراپتامالار تاعايىندالىپ، قىلمىستىق ءىس قوزعالدى.
ءوڭىر پوليتسياسى بارلىق جۇرگىزۋشىلەردى جىلدامدىقتى اسىرماۋعا، جول قاۋىپسىزدىگى تالاپتارىن مۇلتىكسىز ساقتاۋعا جانە قر جول قوزعالىسى ەرەجەلەرىن بۇزباۋعا شاقىرادى.
اۆتور
الما مۇقانوۆا
