الماتى وبلىسىندا ءبىر ءۇيىر جىلقىنى ايداپ كەتكەن ەر ادام 8,5 جىلعا سوتتالدى
قونايەۆ. KAZINFORM - الماتى وبلىسىندا مال يەسىنە 12 ميلليون تەڭگە شىعىن كەلتىرگەن بارىمتاشى سوتتالدى.
الماتى وبلىسى پوليتسيا دەپارتامەنتىنىڭ باسپا ءسوز قىزمەتى ءمالىم ەتكەندەي، مال ۇرلىعى بىلتىر بولعان.
«2023 -جىلدىڭ قىركۇيەك ايىندا جامبىل اۋداندىق پوليتسيا باسقارماسىنا 30 باس جىلقى جوعالعانى تۋرالى جەرگىلىكتى تۇرعىن ارىز ءتۇسىردى. قىلمىستى «ءىزىن سۋىتپاي» اشۋعا مۇمكىندىك بولمادى، سەبەبى جابىرلەنۋشى پوليتسياعا مالدارىن ءوز بەتىنشە ىزدەۋدەن ءۇمىتىن ۇزگەن سوڭ ءبىر اپتادان كەيىن عانا جۇگىنگەن»، - دەپ حابارلادى ۆەدومستۆودان.
جەدەل- ىزدەستىرۋ ءىس-شارالارىن جۇرگىزۋ بارىسىندا ءتارتىپ ساقشىلارى ۇرلانعان جىلقىلار جامبىل وبلىسىنىڭ مەركى اۋدانىندا ەكەندىگى تۋرالى اقپارات الدى.
«كەلىپ تۇسكەن اقپارات بويىنشا ءبىرقاتار تەكسەرۋ جۇمىستارى جۇرگىزىلىپ، ۇرلانعان جىلقىلاردى ساتىپ الۋشى انىقتالدى. سول ادام ارقىلى كۇدىكتى بەلگىلى بولدى. ءمان-جايلاردى زەردەلەي كەلە بارىمتاشتىڭ جىلقىلاردى بىرنەشە كۇن باقىلاعانىن بىلدىك. كەيىن ول قولايلى ءساتتى پايدالانىپ، جايىلىمنان ءبىر ءۇيىر جىلقىنى ايداپ اكەتىپ، الدىن-الا دايىنداعان جەرگە جاسىرعان. سوسىن جۇك كولىگىنە تيەپ كورشى جامبىل وبلىسىنا جەتكىزگەن»، - دەپ اتاپ ءوتتى جامبىل اۋداندىق پوليتسيا باسقارماسى باستىعىنىڭ ورىنباسارى بەيبىت بايزيحانوۆ.
پوليتسيا وكىلىنىڭ سوزىنشە، جامبىل اۋداندىق سوتى 30 باس جىلقىنى ۇرلاعان ەر ادامعا قاتىستى ۇكىم شىعاردى.
«جالپى كەلتىرىلگەن شىعىن 12 ميلليون تەڭگەدەن استى. مال ۇرلىعىن جاساعان ازامات سوتپەن كىنالى دەپ تانىلىپ، 8,5 جىلعا باس بوستاندىعىنان ايىرىلدى»، - دەيدى ول.
