الماتى وبلىسىندا 2024-جىلى قانشا بالا ومىرگە كەلگەن؟
استانا. KAZINFORM — الماتى وبلىسىندا 2024-جىلى 24 مىڭعا جۋىق بالا ومىرگە كەلدى.
2024-جىلى الماتى وبلىسىندا 24 مىڭعا جۋىق ءسابي دۇنيە ەسىگىن اشتى. بۇل كورسەتكىش بويىنشا قاراساي، ىلە، جامبىل، ەڭبەكشىقازاق جانە تالعار اۋداندارى الدىڭعى قاتاردا تۇر.
وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى لەيلا سەرىكبايەۆانىڭ ايتۋىنشا، ايماقتاعى پەرزەنتحانالار ءۇش دەڭگەيلى مەديتسينالىق كومەك كورسەتەدى.
«بيىل الماتى وبلىسىندا 12139 ۇل جانە 11713 قىز بالا دۇنيەگە كەلدى. انا مەن بالاعا كورسەتىلەتىن مەديتسينالىق قىزمەتتىڭ ساپاسىن جاقسارتۋ ءۇشىن دارىگەرلەر بىلىكتىلىكتەرىن تۇراقتى تۇردە ارتتىرىپ وتىرادى.
سونىمەن قاتار، ەڭبەكشىقازاق اۋداندىق كوپسالالى اۋرۋحاناسىندا 26 توسەك-ورىندىق، ال قاراساي اۋداندىق كوپسالالى اۋرۋحاناسىندا 30 توسەك-ورىندىق شالا تۋعان نارەستەلەردى كۇتۋ بولىمدەرى اشىلدى. سونداي-اق، الماتى كوپسالالى كلينيكالىق اۋرۋحاناسىندا ءبىر كۇندىك كلينيكا ءوز جۇمىسىن باستادى. مۇندا جوعارى بىلىكتى ماماندار قىزمەت ەتەدى»، - دەدى لەيلا پەرنەباي قىزى.
جالپى، 2024-جىلى الماتى وبلىسىندا 23852 ءسابي دۇنيەگە كەلىپ، ونىڭ 219 ى ەگىز بولسا، ءبىر رەت ۇشەم تۋعان جاعداي تىركەلدى.
