الماتى وبلىسىندا 1462 جەر ۋچاسكەسى پايدالانىلماي جاتىر

الماتى. KAZINFORM - الماتى وبلىسىندا بىلتىر وڭىردە پايدالانىلماي كەلگەن 1462 جەر ۋچاسكەگە بولىنگەن 422,0 مىڭ گەكتار جەر انىقتالدى.

الماتى وبلىسى اكىمدىگىنىڭ مالىمەتىنشە، ق ر اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ تاپسىرماسى بويىنشا 2024-جىلدىڭ سوڭىنا دەيىن جالپى الاڭى 70 مىڭ گەكتار پايدالانىلماي جاتقان اۋىل شارۋاشىلىعى جەرلەرىن مەملەكەت مەنشىگىنە قايتارۋ كوزدەلگەن.

- اۋىل شارۋاشىلىعى ماقساتىنداعى 89,7 مىڭ گەكتار جەر مەملەكەت مەنشىگىنە قايتارىلدى. جوسپار 128,0 پايىزعا ورىندالدى. ونىڭ ىشىندە 74,8 مىڭ گەكتار جەردى مەنشىك يەلەرى ءوز ەركىمەن بەرگەنى ولاردىڭ زاڭ تالاپتارىن ساقتاۋعا جاۋاپكەرشىلىگىنىڭ ارتقانىن كورسەتەدى. 14,9 مىڭ گەكتار جەر سوت ارقىلى تاركىلەندى، - دەپ حابارلادى اكىمدىكتەن.

الماتى وبلىسىنىڭ جەر قاتىناستارى باسقارماسىنىڭ باسشىسى امانجول ءابدىراحمانوۆ بۇل جۇمىستاردى جالعاستىرۋدىڭ ماڭىزدىلىعىن اتاپ ءوتتى.

- ءاربىر سوتىق جەردى ءتيىمدى پايدالانۋ - وبلىستىڭ، جالپى ەلىمىزدىڭ ازىق-تۇلىك قاۋىپسىزدىگىنە قوسقان ۇلەسى. ءار گەكتار قوعامىمىزعا پايداسىن تيگىزۋ ءۇشىن پايدالانىلماي جاتقان ۋچاسكەلەردى قايتارۋ جۇمىستارىن جۇيەلى تۇردە جالعاستىرامىز، - دەدى ول.

وسىعان دەيىن وڭىردە جالپى اۋماعى 81,4 مىڭ گەكتار جەر مەملەكەت مەنشىگىنە قايتارىلعانى تۋرالى جازعان ەدىك.