«الماتى تۋريزمىنە سالىنعان 1 تەڭگە 34 تەڭگە بولىپ قايتادى» - مامان
الماتى. KAZINFORM - مەگاپوليستە Almaty Tourism Bureau ۇيىمداستىرۋىمەن قالالىق ءتۋريزمدى دامىتۋ جانە بيۋرو جوسپارىمەن تانىستىرۋ ماقساتىندا باسپا ءسوز جيىنى ءوتتى.
جيىن بارىسىندا الماتى تۋريزم بيۋروسىنىڭ ماركەتينگ جانە تالداۋ ءبولىمىنىڭ باسشىسى رۋسلان جانابايەۆ مەكەمەنىڭ ماقساتى مەن مىندەتىن ايتتى.
- ءبىز 2012-جىلى قاراپايىم اقپاراتتاندىرۋ ورتالىعى رەتىندە اشىلدىق، بۇل - الەمدىك تاجىريبە. دۇنيەجۇزىنىڭ بارلىق تۋريستىك قالالارىندا تۋريستەرگە رەسمي گيد بولىپ، قاجەتتى اقپاراتتى بەرە الاتىن ورتالىقتار بار. ءبىراق بيىل ءبىز قايتا قۇرىلدىق، ەندى الماتىنى شەتەلدە ناسيحاتتاۋ جۇمىسىمەن تولىققاندى اينالىسامىز. 2024 -جىلدىڭ جاڭا ترەندى - تۋريستەر ءۇشىن جاڭا باعىتتار، ياعني ادامدار تاريحي عيماراتتاردى، كوپقاباتتى ۇيلەردى كورىپ بولدى. ەندى ولار بۇرىن بىلمەگەن جاڭا الەمدى كورگىسى كەلەدى، سول جەردىڭ تىنىس- تىرشىلىگى، سالت-ءداستۇرى قىزىقتىرادى. سوندىقتان قالامىزدىڭ تۋريستىك الەۋەتى وتە ۇلكەن. قازىردىڭ وزىندە قالادا شەتەلدىك تۋريستەردىڭ وتە كوپ ەكەنىن بايقاۋعا بولادى،- دەدى ول.
رۋسلان جانابايەۆ 2023 -جىلى تۋريزم سەكتورى الماتى قالاسىنىڭ بيۋدجەتىنە 71,7 ميلليارد تەڭگەدەن استام سالىق تۇسىمدەرىن اكەلگەنىن اتاپ ءوتتى. ونىڭ ايتۋىنشا، قالا بيۋدجەتىنە تۇسەتىن بارلىق سالىق كىرىستەرىنىڭ شامامەن %5 ى وسى تۋريزم سەكتورىنان كەلەدى.
- وتكەن جىلى الماتىعا 2 ميلليون تۋريست كەلدى، بۇل - رەكورد. ستاتيستيكا جۇرگىزىلە باستاعان ۋاقىتتان بەرى مۇنداي كورسەتكىش بولماعان. قالا بيۋدجەتىنە قوناق ءۇي سىندى جاتىن ورىندارى 74 ميلليارد تەڭگە، ال تۋريستىك وپەراتورلار 8,7 ميلليارد تەڭگە پايدا اكەلدى. مەگاپوليستىڭ 80 مىڭ تۇرعىنى تۋريستىك سالاعا قاتىسى بار نەمەسە تىكەلەي وسى سەكتوردا جۇمىس ىستەيدى. بۇل قالانىڭ حالقىنىڭ - 7,7 پايىزى. ءبىز پاندەميادان كەيىنگى قيىن كەزەڭدى تولىق وتكەردىك دەي الامىز. الەمدىك ۇيىمدار كوۆيدكە دەيىنگى كورسەتكىشتەرگە ءالى جەتپەدىك دەسە، الماتى بۇل كورسەتكىشتەردەن قازىر اسىپ كەتتى، - دەدى بيۋرونىڭ ءبولىم باسشىسى.
سونداي- اق ول ءتۋريزمدى دامىتۋعا جانە ناسيحاتتاۋعا باعىتتالعان 1 تەڭگە قالاعا سالىق رەتىندە 34 تەڭگە بولىپ قايتاتىنىن ايتتى. الماتى تۋريزم بيۋروسىنىڭ مالىمەتىنە سايكەس، سوڭعى 5 جىل ىشىندە تۋريستىك سالانىڭ قالاعا اكەلەتىن تابىسى 3 ەسە وسكەن.
ەسكە سالا كەتەيىك، بۇعان دەيىن الماتىعا قىتاي ەلىنەن كەلگەن تۋريستەردىڭ سانى 2 ەسە وسكەنىن جازعان بولاتىنبىز.
