الماتى تۇرعىنى پاتەرىنە قوقىس قالدىعىن جيناعان
الماتى. KAZINFORMN - الماتىدا كوپقاباتتى تۇرعىن ۇيدە تۇراتىن ەر ادام پاتەرىنە قوقىس قالدىعىن جيناعان.
الماتىدا قوقىس قالدىعىن جيناعان ەر ادامنىڭ ۆيدەوسى جەلىگە شىقتى. ۆيدەوداعى جازبادا ەر ادامنىڭ پاتەرى جايلى بەينەجازبا جەلىگە شىققان سوڭ، اۋەزوۆ اۋدانىنىڭ اكىمدىگى مەن پوليتسيا قىزمەتكەرلەرى ەر ادامنىڭ ۇيىنە بارعانى جازىلعان.
الماتى قالالىق پوليتسيا دەپارتامەنتىنىڭ مالىمەتىنشە، 17-ساۋىردە اتالمىش تۇرعىنعا قاتىستى العاشقى حابارلاما تۇسكەن.
«تۇرعىندار پاتەردەگى اشى ءيىس پەن انتيسانيتارلىق جاعدايعا شاعىمدانعان. وقيعا ورنىنا ۋچاسكەلىك پوليتسيا ينسپەكتورى بارىپ، باستاپقى ماتەريالداردى جينادى. اتالعان پاتەردىڭ تۇرعىنى زاڭدى تالاپتاردى ورىنداۋدان باس تارتقاندىقتان، اتالعان مەكەنجايعا كوميسسيالىق تەكسەرۋ ۇيىمداستىرىلدى. الايدا، ەر ادام پاتەر ەسىگىن اشقان جوق»، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.
سونداي-اق پوليتسيا پاتەر يەسى ەسىكتى ءوز ەركىمەن اشپاعان سوڭ، پاتەرگە كىرۋ ءۇشىن سوت شەشىمىن كۇتۋ كەرەك ەكەنىن، سەبەبى، ەسىكتى بۇزىپ كىرۋگە پوليتسيانىڭ قۇقىعى جوق ەكەنىن حابارلادى.
اۆتور
الما مۇقانوۆا
