الماتى تۇرعىندارىنىڭ جولعا قاتىستى ماسەلەسى قالاي شەشىلىپ جاتىر

الماتى. KAZINFORM - الماتى اكىمدىگىنىڭ جول ينفراقۇرىلىمىنا ارنالعان ارنايى Telegram-كانالى ىسكە قوسىلعاننان بەرى كۇن سايىن 30-40 ءوتىنىش تۇسەدى. بۇل وتىنىشتەردى ماماندار مەن جۇمىسشىلار ورتا ەسەپپەن ءۇش جۇمىس كۇنى ىشىندە قاراستىرادى.

قالالىق اكىمدىك تاراتقان مالىمەتكە سايكەس، Telegram ارناسىنداعى جول ينفراقۇرىلىمىنا ارنالعان @AlmatyJolybot چات-بوتىنا 23-ساۋىردەن باستاپ كۇن سايىن 30-40 ءوتىنىم تىركەلەدى. بارلىعى 400 دەن استام ءوتىنىش كەلىپ ءتۇستى، ونىڭ %70 دان استامىنا ءتيىستى جاۋاپ بەرىلدى. سونداي-اق وتىنىمدەر open-almaty.kz ينتەرنەت پورتالى مەن eOtinish سەرۆيسى ارقىلى دا قابىلدانادى.

«ءار اۋداننىڭ مەردىگەرلىك ۇيىمدارى مونيتورينگ بارىسىندا جانە قالا تۇرعىندارىنىڭ ءتۇرلى ارنالار ارقىلى كەلىپ تۇسكەن ءوتىنىشى نەگىزىندە انىقتالعان شۇڭقىرلاردى جوندەيدى. جالپى، جۇمىس باستالعالى 41000 شارشى مەتر جول توسەمى اعىمداعى جوندەۋدەن ءوتتى. بۇل رەتتە، جىل سوڭىنا دەيىن 310000 شارشى مەتر اسفالتبەتون جابىنى بار جولداردى جوندەۋ جوسپارلانعان»، - دەپ اتاپ ءوتتى اكىمدىكتەن.

تالداۋ كورسەتكەندەي، الماتىدا شۇڭقىرلاردى جوندەۋدىڭ شامامەن 90 پايىزى 5 جىلدان استام ۋاقىت ورتاشا جوندەۋ جۇرگىزىلمەگەن جولدارعا، سونداي-اق ينجەنەرلىك جەلىلەردى سالۋ جانە جوندەۋ جۇرگىزىلگەن ۋچاسكەلەرگە تيەسىلى. بيىل ۇزىندىعى 250 ك م بولاتىن 274 كوشەدە ورتاشا جوندەۋ جۇمىستارىن جۇرگىزۋ جوسپارلانىپ وتىر.

ەسكە سالايىق، 2023-جىلى الماتىدا ۇزىندىعى 200 ك م بولاتىن 175 كوشەدە جول جابىنىنا ورتاشا جوندەۋ جۇرگىزىلدى، ورتاشا جوندەۋگە كەپىلدىك مەرزىمى 3 جىل، وسى ۋاقىت ىشىندە مەردىگەر كەز كەلگەن اقاۋدى ءوزى تۇزەتەدى.

بۇل رەتتە، بىلتىر پيلوتتىق رەجيمدە قالانىڭ 15 ماگيسترالدىق كوشەسىندە جوندەۋ كەزىندە جولعا جانە جارىققا توزىمدىلىكتى ارتتىرۋعا باعىتتالعان پوليمەراسفالتوبەتون پايدالانىلدى.

مۇنداي قوسپالار توزۋعا ءتوزىمدى، جۇمسارتۋ تەمپەراتۋراسى جوعارى (65-70 گرادۋس). سوندىقتان ىستىققا توتەپ بەرە الادى، الدەقايدا ۇزاعىراق - قازىرگى 5 جىلدىڭ ورنىنا 8-10 جىلعا دەيىن پايدالانۋعا بولادى. بيىل دا بۇل تاجىريبە جالعاسادى.

بۇعان دەيىن الماتىداعى جولداردىڭ بويىنداعى اقاۋلاردى Almaty_Joly Telegram-ارناسىنىڭ چات-بوتىنا حابارلاۋعا بولاتىنى تۋرالى جازعان ەدىك.