الماتى قويمالارىندا ءورت فاكتىلەرى نەلىكتەن كوبەيدى

الماتى. KAZINFORM - جىل باسىنان بەرى الماتىدا 5 قويما ورتەنگەن.

الماتى قالاسى توتەنشە جاعدايلار دەپارتامەنتىنىڭ مالىمەتىنشە، 2025-جىلدىڭ باسىنان بەرى قالادا 112 ءورت فاكتىسى تىركەلگەن. ونىڭ 61 ءى تۇرعىن ۇيدە، بەسەۋى قويمادا، سەگىزى ساۋدا كاسىپورىندارىندا جانە 38 ءى وزگە مەكەمەلەردە بولعان.

Kazinform ساۋالىنا جاۋاپ بەرگەن قالالىق ت ج د باستىعى نۇرلان اتىعايەۆ مەگاپوليس قويمالارىنداعى ءورت فاكتىلەرى كوبەيۋىنىڭ باستى سەبەبىن اتادى.

- قويمالارداعى ءورتتىڭ نەگىزگى سەبەپتەرىنىڭ ءبىرى - ەلەكتر قاۋىپسىزدىگىن ساقتاماۋ. وت ەلەكتر جابدىقتارىن دۇرىس ورناتپاۋ، سونداي-اق دۇرىس قولدانباۋ سالدارىنان بولادى. اتاپ ايتقاندا، سۋىق كەزەڭدە جىلۋ بەرۋ قۇرىلىعىلارى بەلسەندى قولدانىلىپ، ەلەكتر جەلىلەرىنە شامادان تىس جۇك تۇسەدى. سونداي-اق كوبىنەسە قاراۋسىز قالعان ەلەكتر قۇرىلعىلاردان جالىن شىعادى، - دەدى ت ج د باستىعى.

نۇرلان اتىعايەۆ قويمالار تاۋەكەلى جوعارى وبەكتىلەر قاتارىندا ەكەنىن اتاپ ءوتتى. ايتۋىنشا، مۇندا ۇلكەن كولەمدە تاۋارلار ساقتالادى جانە ول جانعىش ماتەريالدار بولۋى مۇمكىن. سوندىقتان ءورتتىڭ الدىن الۋ ءۇشىن قويما يەلەرى مەن جالعا الۋشىلار بىرنەشە نەگىزگى ەرەجەلەردى ساقتاۋى كەرەك.

- قويما ءۇي-جايلارىنىڭ يەلەرى مەن جالعا الۋشىلارىن ءورت قاۋىپسىزدىگى ەرەجەلەرىن ساقتاۋعا شاقىرامىن. بۇل تالاپتاردى بۇزۋ اكىمشىلىك جاۋاپكەرشىلىككە، ءال ورت سالدارىنان ادامدار زارداپ شەكسە نەمەسە قاتتى زاقىم بولسا، بۇل قىلمىستىق جاۋاپكەرشىلىككە اكەلۋى مۇمكىن. دەپارتامەنت ەلەكتر سىمدارىن ۇنەمى تەكسەرىپ وتىرۋدى، ەلەكتر جابدىقتارىنىڭ اقاۋسىز جۇمىس ىستەۋ قاداعالاۋدى ۇسىنادى، - دەدى ول.

جالپى توتەنشە جاعدايلار دەپارتامەنتى قويمالاردا كەلەسى ەرەجەلەردى ساقتاۋعا كەڭەس بەرەدى:

- بىرىنشىدەن، ساقتاۋ ءتارتىبى. تاۋارلاردى رەتسىز قالدىرماۋ كەرەك. سورەلەر اراسىندا وتكەلدەر بولۋى، ال جانعىش ماتەريالدار ارنايى جابدىقتالعان جەرلەردە بولۋى قاجەت.

- ەكىنشىدەن، ەلەكتر قاۋىپسىزدىگى. وت نەگىزىنەن ەلەكتر سىمدارىنداعى قىسقا تۇيىقتالۋ اسەرىنەن تۋىندايدى. سوندىقتان سىمدار جارامدى كۇيدە بولۋى كەرەك، ال قۋاتتى قۇرىلعىلار ۇزارتقىش سىمدارسىز جانە ەلەكتر جەلىسىنە شامادان تىس جۇك تۇسىرمەي قوسىلۋ ءتيىس.

- ءۇشىنشىسى - وت جاعۋعا جانە تەمەكى شەگۋگە تىيىم سالۋ. بەلگىلەنبەگەن جەردە تەمەكى شەگۋ ءورتتىڭ تۋىنداۋىنا اكەلۋى مۇمكىن. تاعى ءبىر ماڭىزدى ماسەلە - قويمادا جارامدى، مەرزىمى وتپەگەن ءورت ءسوندىرۋ قۇرالدارى، دابىل جۇيەسى جانە اۆتوماتتاندىرىلعان ءورت ءسوندىرۋ جۇيەسى ورناتىلۋى كەرەك.

ايتا كەتەيىك، بۇگىنگى كۇنى الماتى قالاسى توتەنشە جاعدايلار دەپارتامەنتىندە 1606 ادام جۇمىس ىستەيدى، ونىڭ ىشىندە ءورت سوندىرۋشىلەر سانى - 822. الماتى قالاسى گارنيزونىنىڭ ءورت ءسوندىرۋ بولىمشەلەرىندە 162 تەحنيكا بار. جالپى قالانىڭ 8 اۋدانىندا 20 ءورت ءسوندىرۋ بولىمدەرى ورنالاسقان.

ەسكە سالايىق، 2025-جىلدىڭ 8-قاڭتار كۇنى الماتىنىڭ الاتاۋ اۋدانىندا ءبىر قاباتتى قويما ورتەندى.

كەيىن 9-اقپان كۇنى تۇركسىب اۋدانىندا قويمادان ءورت شىقتى.

16-اقپان كۇنى رىسقۇلوۆ داڭعىلىندا ورنالاسقان بازار اۋماعىنداعى قويمانى جالىن شارپىدى.

19-اقپاندا اۋەزوۆ اۋدانى وتەگەن باتىر كوشەسىنىڭ بويىنداعى قويما وتقا وراندى.

23-اقپاندا اۋەزوۆ اۋدانى تولە بي كوشەسىنىڭ بويىنداعى قويمادان ءورت شىقتى.