الماتى مەتروسىندا قاۋىپسىزدىك شارالارى كۇشەيتىلدى
الماتى. KAZINFORM - ەسىرتكى جانە باسقا دا تىيىم سالىنعان زاتتاردىڭ زاڭسىز اينالىمىنىڭ الدىن الۋعا ەرەكشە نازار اۋدارىلدى.
ءتارتىپ ساقشىلارى الماتى مەتروسىندا جولاۋشىلاردى تەكسەرۋ-باقىلاۋ شارالارىن كۇشەيتتى.
- مەتروپوليتەن - كۇن سايىن ونداعان مىڭ جولاۋشى جۇرەتىن ستراتەگيالىق ماڭىزدى نىسان. سوندىقتان ءبىزدىڭ مىندەتىمىز - بارىنشا قاۋىپسىز ورتانى قۇرۋ. ءبىز قاۋىپسىزدىك شارالارىن كۇشەيتتىك، تەحنيكالىق قۇرالدار مەن قىزمەتتىك يتتەردى پايدالانا وتىرىپ نىسانداردى ۇنەمى تەكسەرىپ وتىرامىز. ءار الماتىلىق ءوزىن قورعالعان سەزىنۋى ءۇشىن ءبىز باسقا قۇقىق قورعاۋ ورگاندارىمەن تىعىز جۇمىس جاسايمىز، - دەدى مەتروپوليتەندەگى پوليتسيا باسقارماسىنىڭ باسشىسى باتۋرجان ابدۋماساروۆ.
سونداي-اق ول ازاماتتاردى قىراعى بولۋعا، قوعامدىق ءتارتىپ ەرەجەلەرىن ساقتاۋعا جانە قاجەت بولعان جاعدايدا كۇدىكتى زاتتار نەمەسە ادامدار تۋرالى پوليتسيا نەمەسە مەترو قىزمەتكەرلەرىنە حابارلاۋعا شاقىردى.
وسىعان دەيىن، الماتى مەتروپوليتەنى قوس فۋنكسيالى جاڭا قورشاۋلاردى سىناقتان وتكىزىپ جاتقانى تۋرالى جازعانبىز.
بۇدان بولەك، تۋرنيكەتتەردى جاڭارتۋ جۇمىستارى باستالدى.
