الماتى مەن جەتىسۋ سينتەتيكالىق ەسىرتكى ءوندىرىسىنىڭ ورداسىنا اينالىپ بارادى
استانا. KAZINFORM - جىل باسىنان بەرى ەلىمىزدىڭ اۋماعىندا 33 ەسىرتكى زەرتحاناسى جويىلدى. بۇل جايىندا ءماجىلىستىڭ جانىنداعى قوعامدىق پالاتا وتىرىسىندا ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ ايتتى.

«ەلدەگى ەسىرتكى احۋالى ءۇش نەگىزگى فاكتورعا بايلانىستى: وزىمىزدە وسەتىن كانابيس شيكىزاتىنىڭ بولۋى، سولتۇستىك باعىت بويىنشا اۋعان گەروينىنىڭ ترافيگى، سينتەتيكالىق پرەپاراتتاردىڭ تاراتىلۋى. اسىرەسە، وڭتۇستىك وڭىرلەرىمىز ءىرى كولىك- لوگيستيكالىق توراپتاردا ورنالاسقان - الماتى قالاسى، الماتى، جەتىسۋ وبلىستارى. بيىل اتالعان وبلىستاردا سينتەتيكالىق ەسىرتكى وندىرەتىن زەرتحانالاردىڭ نەگىزگى بولىگى بايقالدى. جىل باسىنان بەرى قۇقىق قورعاۋ جانە ارنايى ورگاندارمەن 33 ەسىرتكى زەرتحاناسى جويىلدى. 10 توننادان استام پرەسكۋسورلار تاركىلەندى. وسىلايشا، تۇتىنۋعا دايىن 1 توننا ەسىرتكى زاتىنىڭ وندىرىسىنە جول بەرىلمەدى. بۇل - شامامەن 3 ميلليون ءبىر رەتتىك دوزا جانە مىڭداعان قۇتقارىلعان ءومىر»، - دەدى مارات قوجايەۆ.
ونىڭ دەرەگىنشە، وسى جىلدىڭ 4 ايىندا ەسىرتكىگە قاتىستى 2729 قۇقىق بۇزۋشىلىق، ونىڭ ىشىندە 1117 قىلمىس اشكەرەلەندى.
«734 ەسىرتكى ساتۋ، 179 ءىرى كولەمدە ەسىرتكى ساقتاۋ فاكتىسى انىقتالدى. ەسىرتكى بيزنەسى سالاسىندا ۇيىمداسقان قىلمىستىق توپتى قۇرعانى جانە باسشىلىق جاساعان ءۇشىن 11 قىلمىستىق ءىس قوزعالدى. 2 مىڭ تونناعا جۋىق ەسىرتكى، ونىڭ ىشىندە 234 كەلى سينتەتيكالىق ەسىرتكى تاركىلەندى. سوڭعى 5 -جىلدىڭ ىشىندە تۇتىنۋعا دايىن سينتەتيكالىق ەسىرتكىنى تاركىلەۋ كولەمى 10 كەلىدەن 1 تونناعا دەيىن كۇرت ارتتى»، - دەدى ءمينيستردىڭ ءبىرىنشى ورىنباسارى.