الماتى مەن استانادان الاكولگە جەتۋ جەڭىلدەي ءتۇستى

استانا. KAZINFORM - ءۇرجار اۋدانىنا العاش رەت «SCAT» اۋە كومپانياسىنىڭ ۇشاقتارى قاتىناي باستادى، دەپ حابارلايدى اباي وبلىسىنىڭ اكىمدىگى.

بۇگىن ءۇرجار اۋدانىنىڭ ءۇرجار اۋىلىنداعى اۋەجايعا العاش رەت «SCAT» اۋە كومپانياسىنىڭ «CRJ-200» جولاۋشىلار ۇشاعى قوندى.

- اۋدان تۇرعىندارى بۇعان دەيىن «ان-24» ۇشاعىمەن قاتىناپ كەلگەن بولاتىن. ەندى «ءۇرجار- الماتى» جانە «ءۇرجار- استانا» باعىتتارى بويىنشا تۇراقتى اۋە رەيستەرى اپتاسىنا 7 رەت، ياعني كۇن سايىن ورىندالاتىن بولادى. بۇل جەرگىلىكتى تۇرعىندارعا عانا ەمەس، الاكول مەن ءوڭىردىڭ باسقا دا تۋريستىك نىساندارىنا كەلەتىن قوناقتار ءۇشىن وتە قولايلى. اۋە قاتىناسى مەملەكەت تاراپىنان سۋبسيديالانادى. سول سەبەپتى بيلەت باعاسى دا قولجەتىمدى، - دەلىنگەن حابارلامادا.

كانادادا شىعارىلعان «CRJ-200» ۇشاعى 50 جولاۋشىعا شاقتالعان. اۋە كەمەسى جايلى ءارى ءوڭىرارالىق باعىتتارعا ىڭعايلى.

بيىل وڭىردە تۋريستىك ماۋسىمعا دايىندىق قارقىندى جۇرگىزىلىپ جاتىر. وبلىس اكىمى بەرىك ءۋاليدىڭ تىكەلەي قولداۋىمەن الاكول جاعالاۋىن اباتتاندىرۋعا 658 ميلليون تەڭگە قارجى ءبولىندى. قازىرگى تاڭدا 2018 -جىلدان بەرى جوندەۋ كورمەگەن اربات جاڭارتىلىپ، بوياۋ، سىرلاۋ جۇمىستارى جۇرگىزىلىپ جاتىر. بۇدان بولەك جاعالاۋداعى ەسكىرگەن تەمىر جاقتاۋلار تولىق اۋىستىرىلادى. جاعالاۋداعى 5 شاقىرىمعا جۋىق جولعا اسفالت توسەلەدى، 10 مودۋلدى، 15 بيودارەتحانا، 40 تان استام كيىم اۋىستىراتىن كابينالار قويىلادى، قوقىس جاشىكتەرى مەن بەينەباقىلاۋ كامەرالارىنىڭ سانى ارتادى. جاعالاۋدى نىعايتۋ ءۇشىن پيرس جانە قالقىما ورناتىلادى.

ەرەكشە اتاپ وتەرلىگى، تۋريستەر كوپ كەلەتىن ارباتتىڭ جۇكتەمەسىن ازايتۋ ءۇشىن جاڭا قوعامدىق كەڭىستىك سالىنادى. مۇندا 100 ادامعا ارنالعان ساۋدا- ساتتىق ورىندارى قاراستىرىلادى، ۇلكەن ساحنا، سۋبۇرقاق سالىنادى، تۇرعىندار سەرۋەندەيتىن ارنايى الاڭ بولادى.

بۇعان دەيىن الاكول جاعالاۋىندا 2018 -جىلدان بەرى جوندەۋ جۇمىستارى جۇرگىزىلمەگەنى ايتىلعان ەدى.

اۆتور

اينۇر تۋماكبايەۆا