الماتى مەن استانا اراسىنداعى جول قاشان بىتەدى
كولىك مينيسترلىگى جول جوبالارىنىڭ ىسكە اسىرىلۋ مەرزىمىنە اسەر ەتەتىن نەگىزگى فاكتورلاردى اتادى. سونىمەن قاتار استانا- الماتى باعىتىنداعى تاسجولدى رەكونسترۋكتسيالاۋ جۇمىسى 2024 -جىلدىڭ سوڭىنا دەيىن تولىعىمەن اياقتالاتىنىن ءمالىم ەتتى، دەپ حابارلايدى Kazinform.
استانا- الماتى اۆتوجولى - وڭتۇستىك ءوڭىردى قازاقستاننىڭ ورتالىعىمەن بايلانىستىراتىن نەگىزگى باعىت.
اتالعان ءدالىزدى رەكونسترۋكتسيالاۋ بارىسىندا 4 جولاقتى قوزعالىسى بار I تەحنيكالىق ساناتقا اۋىستىرۋ جۇمىستارىمەن قامتۋ ارقىلى 946 شاقىرىم جول قاراستىرىلعان. ونىڭ 874 شاقىرىمىندا (92 پايىز) جاڭا جابىن سالىنىپ، كولىكتىڭ كەدەرگىسىز قوزعالىسى قامتاماسىز ەتىلدى.
ورتالىق- وڭتۇستىك ءدالىزى «قاراعاندى- بالقاش»، «بالقاش- بۋرىلبايتال»، «بۋرىلبايتال- كۇرتى» سىندى نەگىزگى ءۇش ۋچاسكەگە بولىنگەن. اتاپ ايتقاندا، ۇزىندىعى 363 ك م بولاتىن «قاراعاندى- بالقاش» ۋچاسكەسى بويىنشا جول تولىعىمەن قولدانىسقا بەرىلگەن. قالعان جۇمىستاردى 2024 -جىلى اياقتاۋ جوسپارلانۋدا. جالپى ۇزىندىعى 288 شاقىرىم بولاتىن «بالقاش- بۋرىلبايتال» سەگمەنتىنىڭ 127 شاقىرىمىندا بيىل جۇمىستار تولىق كولەمدە اياقتالىپ، پايدالانۋعا بەرىلدى. ۇزىندىعى 72 ك م ۋچاسكەنى قوسپاعاندا، 161 شاقىرىمدا قوزعالىس اسفالتبەتون جابىنى بويىنشا قامتاماسىز ەتىلگەن. جۇمىستاردى كەلەسى جىلى تولىق اياقتاۋ جوسپارلانىپ وتىر.
جالپى ۇزىندىعى 295 ك م بولاتىن بۋرىلبايتال- كۇرتى ۋچاسكەسىندە بيىل ۇزىندىعى 81 ك م ۋچاسكە پايدالانۋعا بەرىلدى. قالعان 214 ك م-دە جاڭادان سالىنعان اسفالتبەتون جابىنى بويىنشا قوزعالىس اشىلدى.
جول جوبالارىنىڭ ىسكە اسىرىلۋ مەرزىمدەرىنە نەگىزگى جول- قۇرىلىس ماتەريالدارى باعاسىنىڭ كۇرت اۋىتقۋى، قۇرىلىس ماۋسىمىنداعى جول بيتۋمىنىڭ تاپشىلىعى ماسەلەلەرى اسەر ەتكەن. كەيبىر جاعدايلاردا كەلىسىمشارتتىق مىندەتتەمەلەردى جوسىقسىز ورىنداۋ، جۇمىس كەستەسىن بۇزۋ، بۇل سايىپ كەلگەندە كەلىسىمشارتتاردى بۇزۋعا اكەلەدى. ماسەلەن، بيىل ۇزىندىعى 85 ك م كۇرتى- بۋرىلبايتال ۋچاسكەسىندە، ۇزىندىعى 46 ك م بالقاش- بۋرىلبايتال ۋچاسكەسىندە جاڭا مەردىگەرلەر انىقتالىپ، اتالعان ۋچاسكەلەردە بيىل قۇرىلىس- مونتاجداۋ جۇمىستارى جۇزەگە اسىرىلا باستادى.
اتالعان قيىندىقتارعا قاراماستان بيىل استانا- الماتى جوباسىندا اسفالت بەتون توسەمىمەن ءجۇرۋ قامتاماسىز ەتىلدى. جالپى 2024 -جىلدىڭ سوڭىنا دەيىن بارلىق 4 جولاق بويىنشا قوزعالىستى قامتاماسىز ەتە وتىرىپ، جوبانى اياقتاۋ جوسپارلانىپ وتىر.
