الماتى مەن الاتاۋ قالاسىنىڭ اراسىندا سۋتەگىمەن جۇرەتىن تىكۇشاق- تاكسي پايدا بولۋى مۇمكىن
استانا. KAZINFORM - كولىك ءمينيسترى مارات قارابايەۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا قازاقستاندا قاشان پيلوتسىز تاكسي قىزمەت كورسەتە باستايتىنىن ايتتى.
- ءبىز قازىر موبيلدى جولاۋشى تاسىمالى دەيتىن جوبانى كوبىرەك تالقىلاپ جاتىرمىز. بىلتىر جىل اياعىندا ءبىز وڭتۇستىك كورەياعا بارعان ەدىك. سول كەزدە وسىنداي ماسەلەنى تالقىلادىق. اۋەجايدان الاتاۋ قالاسىنا دەيىن جولاۋشىلاردى تاسىمالداۋعا اەروموبيلدەر پايدالانۋ كوزدەلىپ وتىر. بۇل ءوزى شۋ شىعارمايتىن، سۋتەگى تۇتىناتىن، 5 ادامعا دەيىن جولاۋشى سياتىن تىكۇشاق دەۋگە بولادى. قازىر بۇل باعىتتا وڭتۇستىك كورەيا مەن ا ق ش كومپانيالارى تابىستى جۇمىس ىستەپ جاتىر. قازاقستاندىق كومپانيالاردىڭ ءبىرى وسىنداي جوبانى ىسكە اسىرۋعا قىزىعۋشىلىق تانىتتى، - دەدى ول.
ءمينيستردىڭ ايتۋىنشا، اتالعان جوبا ءالى زەرتتەلىپ جاتىر.
- بۇل وسى ماسەلەنى ايتارلىقتاي تەرەڭ زەرتتەدىك جانە ءالى دە پيلوتتىق جوبا رەتىندە ىسكە اسىرۋ ماسەلەلەرىن پىسىقتاپ جاتىرمىز. ءبىرىنشى ساتىسىندا الماتىدان الاتاۋ قالاسىنا دەيىن سىناپ كورەمىز. بۇل 2026 -جىلعا قاراي پيلوتتىق نەگىزدە ىسكە قوسىلۋى مۇمكىن دەپ بولجاپ وتىرمىز، - دەدى مارات قارابايەۆ.
اتالعان باسپا ءسوز ءماسليحاتىندا مارات قارابايەۆ قوسىلعان قۇن سالىعىن كوتەرۋ باستاماسى مەن جانارماي باعاسىنىڭ نارىققا بەرىلۋى تاكسي باعاسىنا قالاي اسەر ەتەتىنى تۋرالى پىكىر ءبىلدىردى.
