الماتى ماڭىنداعى زاڭسىز مەدرەسە: وقۋ قۇنى 90 مىڭ تەڭگە بولعان

الماتى. KAZINFORM - قاراساي اۋدانىنىڭ پروكۋراتۋراسى قۇقىق قورعاۋ ورگاندارمەن بىرلەسىپ 19 بالا زاڭسىز تاربيەلەنگەن جاسىرىن ءدىني مەدرەسەنى انىقتادى. Kazinform ءتىلشىسى اتالعان مەكەمەگە بارىپ، ءىستىڭ ءمان-جايىن انىقتاۋعا تىرىستى.

زاڭسىز ءدىني مەكەمە قاسكەلەڭ قالاسىنداعى جەكە ۇيلەردىڭ بىرىنەن اشىلعان. كورشىلەر تاجىك وتباسى مۇندا 2 جىل بۇرىن كوشىپ كەلگەنىن ايتادى.

- بۇل كىسىلەر ەكى جىل بۇرىن كوشىپ كەلدى. ءبىزدىڭ كورشىلەرىمىز، جامان ادام ەكەنىن بايقامادىم. ۇيىندە كۇيەۋى مەن ايەلى، اتا-اناسى جانە 5 بالاسى بار. ايەلى جۇكتى، جاقىندا بوسانۋى كەرەك. ءۇيىنىڭ ارتىنداعى كىشى ۇيدە شاكىرتتەردى وقىتاتىنىن بىلەمىن. اتا-انالار وزدەرى اكەلىپ، وزدەرى تابىستايدى. كۇنىنە كەم دەگەندە 5-10 كولىك ءۇيدىڭ الدىندا تۇرادى. بالالاردىڭ كوبى تاجىك ۇلتىنان، ءبىراق قازاقتار دا بار، - دەيدى ءۇي كورشىسى.

سونداي-اق ول بۇل مەدرەسەدە اي سايىن 20 شاقتى بالا وقىعانىن جانە وقۋ قۇنى 90 مىڭ تەڭگە بولعانىن اتاپ ءوتتى.

- بالالارىم اۋىرسا، وسى كىسىگە قۇرانمەن الاستاتامىن. بىردەن جازىلىپ كەتەدى. باسقا ءدىني اعىمنىڭ وكىلى ەمەس دەپ ويلايمىن. ۇيىمىزگە قۇران وقۋعا شاقىرعاندا ءبىر وزگەشەلىك بايقامادىم. جازعى ۋاقىتتا بالالاردى وقىتاتىنىن بىلەتىنمىن. ءار اي سايىن 15-20 بالا، ءتىپتى ودان دا كوپ بالا وقيدى. ءبىر ايعا وقۋ قۇنى - 90 مىڭ. مەن دە بالالارىمدى بەرگىم كەلگەن. ويتكەنى بىلۋىمىزشە اراب ءتىلى مەن قۇران ۇيرەتەدى. ۇيدەگى ەر كىسى قاسكەلەڭدەگى مەشىتتەردىڭ بىرىندە يمام بولۋى كەرەك. كۇندە يمامدار كيەتىن جامىلعىسىن كيىپ، مەشىتكە كەتتىم دەپ جۇرەتىن، - دەيدى كورشىسى.

ءۇيدىڭ وزگە كورشىلەرى ولاردى جاقسى ادامدار ەكەنىن ايتۋىمەن شەكتەلدى.

ال الماتى وبلىسىنىڭ اكىمدىگى وبلىس اۋماعىندا زاڭدى تۇردە تىركەلگەن ءدىني ءبىلىم بەرەتىن 1 عانا مەكەمە بار ەكەنىن حابارلادى. ول - قاراساي اۋدانى ءۇشقوڭىر اۋىلىندا ورنالاسقان «ءۇشقوڭىر مەدرەسە- كوللەدجى».

جالپى اكىمدىك مالىمەتىنشە، الماتى وبلىسىنىڭ اۋماعىندا تىركەلگەن 11 كونفەسسياعا تيەسىلى 423 ءدىني بىرلەستىكتىڭ فيليالدارى بار.

ونىڭ ىشىندە 421 ءدىني عيمارات تىركەلگەن: 303 مەشىت، 35 پراۆوسلاۆ شىركەۋى، 10 ريم كاتوليك شىركەۋى، 63 پروتەستانت شىركەۋى، 9 يەگوۆا كۋاگەرلەرى، 1 كريشنا ساناسى قوعامى.

سونداي-اق الماتى وبلىسىنىڭ ءدىن ىستەرى باسقارماسى ءدىني ءبىلىم بەرەتىن مەكەمەنىڭ تىركەلۋ ءتارتىبىن ءتۇسىندىردى.

- مەدرەسە- كوللەدجدى زاڭداستىرۋ ءۇشىن باستاپقىدا ءوتىنىش جازۋ ارقىلى قازاقستان مۇسىلماندارى ءدىني باسقارماسىنىڭ الماتى وبلىسى بويىنشا وڭىرلىك وكىلدىگىنە جۇگىنۋ قاجەت. قاجەتتى قۇجاتتاردى ءدىني باسقارمادان العاننان كەيىن الماتى وبلىسىنىڭ ءبىلىم سالاسىندا ساپانى قامتاماسىز ەتۋ دەپارتامەنتىنە ە-ليتسەنزيا ارقىلى ءوتىنىش جىبەرىلەدى، - دەپ حابارلادى باسقارمادان.

اۆتور
دوسبول اتاجان