الماتى كاسىپكەرلەرى جىل باسىنان بەرى قانشا تەڭگە سالىق تولەگەن
الماتى. KAZINFORM - مەگاپوليستە 406 مىڭنان استام شاعىن جانە ورتا بيزنەس سۋبەكتىلەرى تىركەلگەن.
بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالاسىنىڭ «اتامەكەن» وڭىرلىك كاسىپكەرلەر پالاتاسىنىڭ ديرەكتورى نۇرسۇلتان شوقانوۆ مالىمدەدى.
ونىڭ ايتۋىنشا، الماتىلىقتار كاسىپكەرلەر بيىل 4 اي ىشىندە 2 تريلليون تەڭگەگە جۋىق سالىق تولەگەن. جالپى سالىق تۇسىمدەرىنىڭ %40 ى شەتەلدىك كومپانيالارعا تيەسىلى.
«الماتى - قازاقستاندىق كاسىپكەرلىكتىڭ ورتالىعى. وتكەن جىلى عانا رەسپۋبليكالىق قازىناعا الماتى بيزنەسى 5 تريلليون تەڭگەدەن استام قارجى اۋدارعان. 2024 -جىلدىڭ 4-ايىندا - 1,7 تريلليون تەڭگەدەن استام سالىق تولەندى. ءبىر قىزىعى، شەتەلدىك قاتىسۋى بار كاسىپورىنداردىڭ ۇلەسىنە سالىق تۇسىمدەرىنىڭ %40 عا جۋىعى تيەسىلى، ياعني الماتى حالىقارالىق بيزنەس جۇرگىزىلەتىن قالالار اراسىندا وڭىرلىك كوشباسشى مارتەبەسىن راستايدى»، - دەدى نۇرسۇلتان شوقانوۆ.
سونداي- اق ول الماتى قالاسىنىڭ و ك پ قۇرىلىمىندا قۇقىقتىق قورعاۋ، قوعامدىق مونيتورينگ جانە مەملەكەتتىك ورگاندارمەن ءوزارا ءىس- قيمىل ءبولىمى جۇمىس ىستەيتىنىن اتاپ ءوتتى. بۇل ءبولىم كاسىپكەرلەرگە جان- جاقتى قۇقىقتىق كومەك كورسەتەدى.
«تەك 2023 -جىلدىڭ وزىندە الماتى قالاسىنىڭ و ك پ بيزنەستىڭ 2720 ءوتىنىشىن قارادى. ءبىزدىڭ ارالاسۋىمىزدان كەيىن 6 مىڭنان استام كاسىپكەردىڭ قۇقىقتارى قورعالدى. نەگىزىنەن كەلىسىم كوميسسياسىنىڭ ماتەريالدارى بويىنشا زاڭسىز ەسەپتەلگەن ايىپپۇلدار، ءوسىمپۇلدار، قوسىمشا ەسەپتەۋلەر، مۇلىكتىك شىعىنداردىڭ الدىن الدى»، - دەدى ول.
