الماتى بيۋجەتىنەن ۇنەمدەلگەن قارجى الەۋمەتتىك سالاعا جۇمسالادى

قالالىق ءماسليحاتتىڭ كەزەكتەن تىس XI سەسسياسىندا دەپۋتاتتار الماتىنىڭ 2023-جىلعا ارنالعان ناقتىلانعان بيۋجەتىن بەكىتتى. ۇنەمدەلگەن 24 ميلليارد تەڭگە الەۋمەتتىك سالاعا جۇمسالاتىن بولدى، دەپ حابارلايدى Kazinform.

قالا ءماسليحاتىنان ءمالىم ەتكەندەي، كۇن تارتىبىندەگى نەگىزگى ماسەلەلەردىڭ ءبىرى - الماتى قالاسىنىڭ 2023-2025-جىلدارعا ارنالعان بيۋجەتىنە وزگەرىستەر ەنگىزۋ بولدى.

«بيىل ۇنەمدەلگەن 24 ميلليارد تەڭگە كولەمىندەگى قاراجاتتى الەۋمەتتىك ماڭىزدى جوبالار مەن ءىس-شارالارعا باعىتتاۋ تۋرالى شەشىم قابىلداندى. قاراجات بيۋجەتتىك باعدارلامالار اكىمشىلەرى اراسىندا قاراجاتتى قايتا ءبولۋ جانە مەملەكەتتىك ساتىپ الۋدى جۇرگىزۋ كەزىندە ۇنەمدەۋ ەسەبىنەن قالىپتاستىرىلدى»، - دەپ حابارلادى ءماسليحاتتان.

الەۋمەتتىك سالاعا 6,1 ميلليارد تەڭگە ءبولۋ جوسپاردا. ونىڭ ىشىندە 1,3 ميلليارد تەڭگەدەن - 8 مەملەكەتتىك كوللەدجدى اعىمداعى جوندەۋگە، سونداي-اق ەكى كوللەدجدى ماتەريالدىق- تەحنيكالىق جاراقتاندىرۋعا باعىتتالعان.

تاعى 1,3 ميلليارد تەڭگە ۇلكەن كونتسەرت زالىنداعى جابدىقتاردى اۋىستىرۋعا جانە وقۋشىلار سارايىنىڭ بالالار مۋزىكا مەكتەبىنە ارنالعان جابدىقتاردى ساتىپ الۋعا بولىنەدى.

بيىل بوستاندىق اۋدانىنداعى «وربيتا» شاعىن اۋدانىنداعى  145№ مەكتەپ عيماراتىن سەيسميكالىق كۇشەيتۋ جانە كۇردەلى جوندەۋ جۇمىستارى اياقتالۋدا، وعان 145,6 ميلليون تەڭگە ءبولىندى.

دەنساۋلىق ساقتاۋ سالاسىنا 1,2 ميلليارد تەڭگە قاراستىرىلعان. اشىلعان ساتتەن باستاپ العاش رەت مىنا مەديتسينالىق مەكەمەلەر بويىنشا:  4№ ەمحانا (ەكى بولىمشە)، بالالار ءۇيى، ادامنىڭ كوبەيۋ ورتالىعى، بيۋجەتتەن كۇردەلى جوندەۋ جۇرگىزۋگە 600 ميلليون تەڭگە بولىنەدى.

قۇرىلىسى اياقتالۋعا جاقىن «قاراسۋ» شاعىناۋدانىنداعى وتباسىلىق-دارىگەرلىك امبۋلاتوريانىڭ جوباسىنا 72,9 ميلليون تەڭگە جوسپارلانعان.

تكش سالاسىنا 3,8 ميلليارد تەڭگە قاراستىرىلعان. ناۋرىزباي اۋدانىنداعى كوپپاتەرلى تۇرعىن ۇيلەرگە ينجەنەرلىك جەلىلەردى جۇرگىزۋگە 1,5 ميلليارد تەڭگە ءبولىندى. جۇمىستار 2023-جىلدىڭ سوڭىنا دەيىن اياقتالادى.

الماتى اكىمىنىڭ ۇسىنىسى بويىنشا «الماتى جاستارى» باعدارلاماسىن قولداۋ جالعاسىپ جاتىر. بيۋجەتتەن ءتۇرلى قىزمەت سالاسىنىڭ جاس قىزمەتكەرلەرى ءۇشىن 55 يپوتەكالىق قارىزعا قوسىمشا 965 ميلليون تەڭگە ءبولىندى.

بيىل 7 مىڭ تۇتىنۋشىنى ۇزدىكسىز ەلەكترمەن جابدىقتاۋدى قامتاماسىز ەتۋ ءۇشىن «قايرات» ش/ا ەلەكتر جەلىلەرىنىڭ قۇرىلىسى اياقتالۋدا. بۇل جوبا 1,2 ميلليارد تەڭگە كولەمىندە ينۆەستيتسيالاردى تالاپ ەتەدى.

كولىك ينفراقۇرىلىمىن قارجىلاندىرۋعا 6,2 ميلليارد تەڭگە قاراستىرىلعان.

سۋبسيديا جۇيەسى ارقىلى الەۋمەتتىك ماڭىزى بار مارشرۋتتار بويىنشا جولاۋشىلار تاسىمالىن قولداۋعا 4,7 ميلليارد تەڭگە ءبولۋ ۇسىنىلادى.

ۇلتتىق جوبا اياسىندا الماتىدا كاسىپكەرلىكتى قولداۋ ءۇشىن 1,5 ميلليارد تەڭگە ءبولۋ جوسپارلانعان.

بۇل قاراجات كرەديتتەر بويىنشا پايىزدىق مولشەرلەمەلەردى سۋبسيديالاۋعا جانە كاسىپكەرلەردىڭ دامۋى مەن تۇراقتى تابىسىنا ىقپال ەتەتىن جاڭا بيزنەس-يدەيالار ءۇشىن يننوۆاتسيالىق گرانت بەرۋگە باعىتتالادى.