الماتى گارنيزونىنىڭ اسكەري قىزمەتشىلەرى بيبىگۇل تولەگەنوۆانى قۇتتىقتادى
اسكەريلەر اتاقتى وپەرا ءانشىسىن 94 جاسىمەن قۇتتىقتاپ، كەزدەسۋ مەملەكەتتىك مەرەكەمەن تۇسپا-تۇس كەلدى، دەپ حابارلايدى Kazinform ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ كۋرسانتتارى مەن قارۋلى كۇشتەر ۇلتتىق اسكەري- پاتريوتتىق ورتالىعىنىڭ الماتى فيليالىنىڭ ءانشىسى ارۋجان الپىسبايەۆا تۋعان كۇن يەسىنە ارناپ تانىمال ءانشىنىڭ ءوز رەپەرتۋارىنان اندەر شىرقادى.
بيبىگۇل تولەگەنوۆا ەسىمى قازاققا عانا ەمەس، جاقىن جانە الىس شەتەلدەنى ونەرسۇيەر قاۋىمعا كەڭىنەن تانىمال. ول كينو الەمىندە دە ەلەۋلى ءىز قالدىردى جانە بىرنەشە بۋىن شاكىرت تاربيەلەدى.
بيبىگۇل احمەت قىزى جانكۇيەرلەرىن ءور رۋحىمەن، تاباندىلىعىمەن جانە اقىل-ويىنىڭ ۇشقىرلىعىمەن تاڭ قالدىرىپ كەلەدى. ءانشى اسكەري قىزمەتشىلەردىڭ جىلى لەبىزىنە ريزا بولىپ، ولارعا ءوزىنىڭ شىعارماشىلىعى تۋرالى اڭگىمەلەپ بەردى.
- اسكەري ماماندىق وتانعا شىن بەرىلىپ ادال قىزمەت ەتۋدى تالاپ ەتەدى جانە ءاردايىم ءومىرىڭ تاۋەكەل ەتۋمەن بايلانىستى. ءبىر جاعىنان، بۇل ەر- ازاماتتى شىڭدايدى، ەكىنشى جاعىنان بۇل قىزمەت ابىرويلى مارتەبە. ەگەر ءسىز كاسىبي اسكەري قىزمەتشى بولام دەسەڭىز، وندا وسى ماقساتقا جەتۋدە تاباندىلىق كورسەتىپ، وتان يگىلىگى ءۇشىن وقىپ، ەڭبەك ەتۋىڭىز كەرەك، - دەدى بيبىگۇل تولەگەنوۆا.
قازاقتىڭ بۇلبۇلى قارۋلى كۇشتەردىڭ بارلىق اسكەري قىزمەتشىلەرىن تاۋەلسىزدىك كۇنىمەن شىن جۇرەكتەن قۇتتىقتاپ، زور دەنساۋلىق پەن بەيبىت اسپان تىلەدى.
