الماتى اكىمى لاكي كەسوگلۋعا 1- دارەجەلى «بارىس» وردەنىن تابىس ەتتى
الماتى. KAZINFORM - الماتى اكىمى ەربولات دوسايەۆ دارىندى انشىگە ماراپاتتى تابىستاپ، ەل پرەزيدەنتىنىڭ اتىنان 85 جىلدىق مەرەيتويىمەن قۇتتىقتادى.
«تابيعي تالانت پەن قاجىرلى ەڭبەكتىڭ ارقاسىندا ءسىز ۇلكەن شىعارماشىلىق جولدان ءوتتىڭىز، ەسترادالىق ساحنادا كاسىبي دەڭگەيدە تانىلۋعا جانە تابىسقا قول جەتكىزدىڭىز. ەلىمىزدە جانە شەتەلدە كوپتەگەن جانكۇيەر ءسىزدى جوعارى ورىنداۋ مادەنيەتى، مانەرلى ليريكالىق تەنورى، ءارتۇرلى جانرلار مەن ستيلدەگى اندەردىڭ مول رەپەرتۋارى ءۇشىن جاقسى كورەدى جانە باعالايدى. ءسىزدىڭ ونەرگە قىزمەت ەتۋىڭىز، مادەني جانە رۋحاني مۇرانى ارتتىرۋعا، دارىندى جاستاردى تاربيەلەۋگە قوسقان زور ۇلەسىڭىز ۇلكەن قۇرمەتكە لايىق»، - دەلىنگەن قاسىم-جومارت توقايەۆتىڭ قۇتتىقتاۋىندا.
لاكي (پانتەلەي) كەسوگلۋ 1939 -جىلى تۋعان، قۇرمانعازى اتىنداعى مەملەكەتتىك كونسەرۆاتوريانى «وپەرا، كونسەرتتىك ءانشى، وقىتۋشى» ماماندىعى بويىنشا بىتىرگەن.
ەڭبەك جولىن 1967 -جىلى كونسەرۆاتوريا جانىنداعى وپەرا ستۋدياسىنىڭ سوليسى قىزمەتىنەن باستاعان. 1970 -جىلى ماسكەۋدە وتكەن بۇكىل وداقتىق ەسترادا ارتيستەردىڭ بايقاۋىندا ديپلومانت بولدى. 1972 -جىلدان 1998 -جىلعا دەيىن قازاق تەلەۆيزياسى مەن راديوسى ەسترادالىق-سيمفونيالىق وركەسترىنىڭ جەتەكشى سوليسى بولىپ جۇمىس ىستەدى. وسى كەزەڭدە ول ماسكەۋدەگى وداقتار ءۇيىنىڭ كولوننا زالىندا ديريجەرلەر يۋ. سيلانتيەۆ، ۆ. ليۋدۆيكوۆسكي، ب. كارامىشەۆ، گ. گارانيان، يۋ. ميحايلوۆ، ۆ. مەشەريننىڭ جەتەكشىلىگىمەن بۇكىل وداقتىق راديونىڭ ۇزدىك وركەسترلەرىمەن بىرگە كرەمل سەزدەر سارايىندا، «رەسەي» كونسەرت زالىندا ونەر كورسەتتى.
لاكي كەسوگلۋ ءوزىنىڭ مانسابىندا كەڭەستىك جانە گرەك اندەرى بار بىرنەشە گرامموفون كۇيتاباقتى، سونداي-اق «كاپريزنايا پوگودا» جازباسىن جازدى، وندا تانىمال قازاقستاندىق اۆتورلار تىلەس قاجىعاليەۆ، الماس سەركەبايەۆ، ەدۋارد بوگۋشەۆسكي جانە ت. ب. ءانىن ورىندادى.
سونىمەن قاتار، لاكي كونستانتينوۆيچ قازاقستان مەتسەناتتارىنىڭ «تارلان» جوعارى مۋزىكالىق سىيلىعىنىڭ يەگەرى، II دارەجەلى «دوستىق» (2004 ج. ) جانە «پاراسات» (2019 ج. ) وردەندەرىمەن ماراپاتتالعان.
وسىعان دەيىن ق ر پرەزيدەنتى لاكي كەسوگلۋدى I دارەجەلى «بارىس» وردەنىمەن ناگرادتاعان ەدى.
اۆتور
الما مۇقانوۆا
