الماتى اۋەجايىنداعى وقيعا: مۇسا ءابدىرايىم بۇكىلالەمدىك بوكس كەڭەسىنىڭ بەيبىتشىلىك ەلشىسى بولدى

استانا. KAZINFORM - الماتى حالىقارالىق اۋەجايىندا كەپىلگە الىنعان قىزمەتكەردى ەرلىكپەن قۇتقارىپ قالعان مۇسا ءابدىرايىم بۇكىلالەمدىك بوكس كەڭەسىنىڭ (WBC) بەيبىتشىلىك ەلشىسى بولىپ تاعايىندالدى.

بۇل تۋرالى WBC ۇيىمىنىڭ پرەزيدەنتى حوسە سۋلەيمان الەۋمەتتىك جەلىدەگى پاراقشاسىندا جاريالادى.

حوسە سۋلەيمان قازاقستاندىق ءاليحان جارىلعاپوۆ ارقىلى ەرلىك كورسەتكەن مۇسا ابدىرايىممەن تەلەفون ارقىلى سويلەسىپ، ونىڭ ءىس-ارەكەتىن جوعارى باعالادى. سونىمەن قاتار، ونى رەسمي تۇردە ۇيىمنىڭ بەيبىتشىلىك ەلشىسى دەپ جاريالادى.

- مەن ونىمەن قاتار تۇرعانىمدى ماقتان تۇتامىن. سپورت ءۇشىن عانا ەمەس، ادامزات ءۇشىن ناعىز باتىر، - دەدى ۇيىم باسشىسى.

وسىعان دەيىن الماتى اۋەجايىندا جولاۋشى قىزمەتكەردىڭ شاشىنان تارتىپ، كوپشىلىك الدىندا پىشاق كەزەنگەنى تۋرالى جازدىق.

ىشكى رەيستەر تەرمينالىندا ەر ادام جولاۋشى رەتىندە ۇشۋ الدىنداعى تەكسەرۋ ايماعىنا بارعان. اۆياتسيالىق قاۋىپسىزدىك قىزمەتكەرلەرى ەر ادامنان قۇجاتتاردى كورسەتۋدى سۇراعان، ال ول اۋەجاي قىزمەتكەرىن شاشىنان ۇستاپ، پىشاقپەن قورقىتقان.

كەيىنىرەك پرەزيدەنت مۇسا ءابدىرايىمدى «ەرلىگى ءۇشىن» مەدالىمەن ناگرادتادى.

اۆتور مۇحتار قاليموللا ۇلى