الماتى اۋەجايىندا ەرلىك جاساعان ادام تانىمال ءانشىنىڭ تۋىسى بولىپ شىقتى

استانا. KAZINFORM - الماتى اۋەجايىندا ەرلىك جاساعان ادام تانىمال ءانشى باعلان ءابدىرايىموۆتىڭ تۋىسى بولىپ شىقتى.

ونەر يەسىنىڭ سوزىنشە، بەيبىت كۇننىڭ باتىرى اتانعان - اكەسىنىڭ ءىنىسى مۇسا.

«ءابدىرايىموۆ مۇسا سايرامباي ۇلى. 1973-جىلى تۇلكىباس اۋدانى كۇمىسباستاۋ اۋىلىندا دۇنيەگە كەلگەن. 9 بالانىڭ كەنجەسى. كاسىبي سپورتپەن شۇعىلدانعان. قازىر 5 بالاسى بار، ارداقتى اكە. بۇگىنگى ەرلىگى راس، ەل شۋلاپ جاتىر. نامىستى جىگىتتىڭ ءبارى سونداي باتىلدىق جاسار ەدى… ەشكىم باتىر بولامىن، قاھارمان بولامىن دەپ جوسپارمەن جۇرمەسى انىق. دەر كەزىندە دۇرىس شەشىم قابىلداپ، ءومىرىڭىزدى تاپسىرا سالعانىڭىز - ەرلىك!.. مەملەكەتتىك ماراپاتقا دا ۇسىنىپ ۇلگەرىپتى. بالا-شاعانىڭ نەسىبەسى تاۋسىلماسىن. كەز كەلگەن ماراپاتقا لايىقسىز! ءبىز سىزبەن ماقتانىپ جۇرەيىك»، - دەدى ول.

ايتا كەتەيىك، بۇعان دەيىن كومەككە ۇمتىلعان ادامنىڭ ەسىمى مۇسا ءابدىرايىم ەكەنى حابارلاندى.

توسىن وقيعا تۋرالى نە بەلگىلى؟

7-ناۋرىزدا الماتى اۋەجايىندا قولىندا سۋىق قارۋى بار ەر ادام قىزمەتكەردى كەپىلگە الدى. جەلىدە اۋەجايدا تۇسىرىلگەن ۆيدەو تارادى. كادرلاردان قولىندا پىشاعى بار ەر ادام قىزدىڭ شاشىنان ۇستاپ العانىن بايقاۋعا بولادى. وقيعا ىشكى تەرمينالدا بولعان.

اۋەجايدىڭ باسپا ءسوز قىزمەتى مالىمەتىنشە، ەر ادام ءوزىن جولاۋشى رەتىندە كورسەتىپ، رەيس الدىنداعى قاۋىپسىزدىك ايماعىنا جاقىنداعان. قىزمەتكەرلەر ودان قۇجاتىن سۇراعان كەزدە ول قىزمەتكەردى پىشاقپەن قورقىتقان. 7 مينۋتتان كەيىن شابۋىلداۋشىنى پوليتسيا مەن اۆياتسيالىق قاۋىپسىزدىك قىزمەتكەرلەرى ۇستادى. ول قاماۋعا الىندى.

ارتىنشا پرەزيدەنت الماتى اۋەجايىنداعى وقيعاعا قاتىستى باتىل ازاماتتى ماراپاتتاۋدى تاپسىردى.

سونداي-اق، وقيعانىڭ تاعى ءبىر ۆيدەوسى تارادى.