الەمگە تانىمال Wanderlust باسىلىمى قازاقستاندى ەڭ تانىمال تۋريستىك باعىتتاردىڭ قاتارىنا قوستى
استانا. KAZINFORM - بيىل بەدەلدى تۋريستىك باسىلىمداردا قازاقستان تۋرالى ماقالالار ءجيى شىعىپ جاتقانىن بايقايمىز.
شەتەلدىك تۋريستەر مەن ب ا ق تاراپىنان سۇرانىستىڭ ارتۋى ەلىمىزدەگى ءتۋريزمنىڭ بەلسەندى دامۋىمەن، اتاپ ايتقاندا، بيىل كۇزدە ەلىمىزدە وتەتىن دۇنيەجۇزىلىك كوشپەندىلەر ويىندارىمەن بايلانىستى.
«Kazakh Tourism» ۇ ك» ا ق باسپا ءسوز قىزمەتىنىڭ حابارلاۋىنشا، Wanderlust الەمدىك باسىلىمىنىڭ رەيتينگىندە قازاقستان توپ-24 ەلدىڭ قاتارىنا ەندى.
ايتا كەتەيىك، قازاقستان ورتالىق ازيا مەملەكەتتەرىنەن رەيتينگكە ەنگەن جالعىز مەملەكەت.
«جىلدان جىلعا قازاقستان شەتەلدىك تۋريستەردىڭ قىزىعۋشىلىعىن ارتتىرۋدا. سەبەبى، ءبىز Wanderlust ءتىڭ امەريكالىق جانە ەۋروپالىق وقىرماندارى ءۇشىن سالىستىرمالى تۇردە جاڭا باعىتپىز. باسىلىم تىزىمىنە ەنۋ ەلىمىزدەگى ءتۋريزمدى دامىتۋ بارىسىنداعى ۇلكەن جەتىستىك دەسەك بولادى. شەتەلدىك تۋريستەردىڭ دۇنيەجۇزىلىك كوشپەندىلەر ويىندارى تۋرالى ءبىلۋى دە ءبىز ءۇشىن ماڭىزدى. بيىل ونى استانادا وتكىزەمىز. كەلۋشىلەر ءۇشىن قازاقستاندى، اسىرەسە استانانى جاڭا قىرىنان اشۋعا تىرىسامىز»، - دەدى «Kazakh Tourism» باسقارما ءتوراعاسى قايرات ءسادۋاقاسوۆ.
V دۇنيەجۇزىلىك كوشپەندىلەر ويىندارىنا دەگەن قىزىعۋشىلىق ۇلى بريتانيا تۋريستەرىنىڭ اراسىندا ەرەكشە سۇرانىسقا يە. قازاقستان بريتاندىق Wanderlust جۋرنالىنىڭ بەدەلدى رەيتينگىنە ەنگەننەن كەيىن دۇنيەجۇزىلىك كوشپەندىلەر ويىندارىنا باعىتتالعان تۋرلان تەز ساتىلىپ كەتتى.
مىسالى، Regent Holidays بريتاندىق تۋريستىك اگەنتتىگى ۇسىناتىن تۋر قازىردىڭ وزىندە «sold out» ستاتۋسىندا. Wild Frontiers تۋرلارىنىڭ جارتىسى ساتىلىپ كەتكەن، ال قالعان جارتىسىنداعى ءار تۋرعا تەك ءبىر عانا بيلەت بار.
سۇرانىستىڭ بۇل دەڭگەيى قازاقستانداعى تۋريستىك ءونىمدى پوزيتسيالاۋداعى ەتنيكالىق باعىتتىلىعىنىڭ ءساتتى بولعانىن دالەلدەيدى. وعان قوسا، حالىقارالىق اۋديتوريا اراسىندا قازاقستاندىق مادەني مۇراعا جوعارى باعا مەن ەرەكشە كوڭىل بولىنەتىنىن كورسەتەدى.
قازاقستان رەسپۋبليكاسى وسىنداي ايتۋلى شارانىڭ ۇيىمداستىرۋشىسى بولا وتىرىپ، مادەني تۋريزم مەن حالىقارالىق ديالوگ ورتالىعى رەتىندەگى ۇستانىمىن نىعايتىپ كەلەدى. بۇل ستراتەگيالىق كوزقاراس ىشكى جانە كىرۋ ءتۋريزمىن دامىتۋدى ىنتالاندىرۋعا مۇمكىندىك بەرەدى.
«Kazakh Tourism» ۇ ك» ا ق وسى شارانى ىلگەرىلەتۋگە قوسقان ۇلەستەرى ءۇشىن بارلىق سەرىكتەستەر مەن قاتىسۋشىلارعا العىسىن ءبىلدىرىپ، حالىقارالىق تۋريستىك قاۋىمداستىقتى بۇل ايتۋلى ءىس- شاراعا بەلسەندى قاتىسۋعا شاقىرادى.
