الەم چەمپيونى قاجىمۇقان مۇڭايتپاسوۆ تۋرالى كوركەم فيلم كورەرمەنگە جول تارتادى

استانا. قازاقپارات – 10-قازاننان باستاپ ەلىمىزدىڭ بارلىق كينوتەاترلارىندا «Qajymuqan» فيلمى كورسەتىلىمىن باستايدى. فيلم رەجيسسەرى قاناعات مۇستافين تاريحي فيلم سەناريىنە 2012-جىلى كىرىسىپ، 2020-جىلى ءتۇسىرىلىمىن باستاپ، 10 جىلدان استام ۋاقىت زەرتتەۋ جۇرگىزىپ، ۇلكەن ەكرانعا ۇسىنباق.

بۇل تۋرالى فيلم رەجيسسەرى قاناعات مۇستافين حابارلادى.

تۋىندى ق ر مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن ءتۇسىرىلدى.

قاجىمۇقان مۇڭايتپاسوۆ - فرانسۋز كۇرەسىنەن الەم چەمپيونى اتانعان تۇڭعىش قازاق، الەمدىك، وڭىرلىك، رەسەيلىك، كەيىن بۇكىلوداقتىق سۋپەر اۋىر سالماقتاعى كلاسسيكالىق كۇرەس چەمپيوناتتارىنىڭ بىرنەشە دۇركىن جەڭىمپازى. فرانسۋز كۇرەسىنەن چەمپيون اتاعىن جەڭىپ العان، اسا اۋىر سالماقتا وتكىزىلەتىن كلاسسيكالىق كۇرەستە بۇكىلوداقتىق جانە الەم چەمپيوناتتارىنىڭ بىرنەشە رەت جەڭىمپازى اتانعان تۇڭعىش قازاق بالاسىنىڭ عۇمىرىمەن وسكەلەڭ ۇرپاق تانىسۋ كەرەك، ءبىلۋ كەرەك، ۇلىقتاۋ ءارى ۇلگى الۋ كەرەك دەگەن نيەتپەن ۇلكەن ەكراندا جارق ەتپەك.