الدىن الا اقپارات: اقتاۋ ماڭىنداعى ۇشاق اپاتىنان ءتىرى قالعان قازاقستاندىقتار جوق

استانا. KAZINFORM - قازىر اقتاۋدا جۇرگەن ق ر پرەمەر-ءمينيسترىنىڭ ورىنباسارى قانات بوزىمبايەۆ اۋە اپاتىنا قاتىستى سوڭعى مالىمەتپەن ءبولىستى. بۇل تۋرالى Tengrinews.kz حابارلايدى.

ۇكىمەت باسشىسى ورىنباسارىنىڭ مالىمەتىنشە، اۋە اپاتىنان 38 ادام مەرت بولدى.

- تابىلعان ادام دەنەلەرى ناشار جاعدايدا، كوبىسى كۇيىپ كەتكەن، بارلىق مۇردە جينالدى، ەندى ءمايىتحانادا ولاردىڭ جەكە باستارى انىقتالادى. ءتىرى قالعان 29 ادام، ونىڭ ىشىندە ەكى بالا بار، قازىر زارداپ شەككەندەر اۋرۋحانادا. ولاردىڭ ىشىندە 11 ادامنىڭ جاعدايى تۇراقتى اۋىر، قالعاندارىنىڭ ءحالى ورتاشا، - دەپ باعالادى قانات بوزىمبايەۆ.

ودان بولەك، پورتال ءتىلشىسى پرەمەر-ءمينيستردىڭ ورىنباسارىنان ۇشاق بورتىندا بولعان قالعان قازاقستاندىقتاردىڭ تاعدىرىن ناقتىلادى.

- وكىنىشكە قاراي، بۇگىنگى كۇنگە دەيىن ءتىرى قالعاندار تۋرالى… ازىرگە، كىم ەكەنى انىقتالماعان ايەل بار. ول ەس-ءتۇسسىز، قۇجاتى دا جوق، اۋرۋحانادا جاتىر. قالعان 29 (ءتىرى قالعاندار) ادامنىڭ اراسىندا بىردە-ءبىر قازاقستاندىق جوق، جالپى 6 قازاقستاندىق ادام بولدى، ونىڭ ىشىندە ەكى بالا بار، - دەيدى ول.

ونىڭ ايتۋىنشا، اپاتتىڭ ءمان-جايىن انىقتاۋ قازاقستاننىڭ باس پروكۋراتۋراسىنىڭ، سونداي-اق ىشكى ىستەر مينيسترلىگى مەن اۋە باسقارماسىنىڭ باقىلاۋىمەن جۇرگىزىلەدى.

- وقيعا ءبىزدىڭ اۋماقتا بولدى، تەرگەۋدى باس پروكۋراتۋرا، سونداي-اق ىشكى ىستەر مينيسترلىگى مەن اۋە بيلىگى جۇرگىزەدى. وقيعا ورنىندا ءازىربايجاندىق ارىپتەستەر بار، ولاردا قاتىسادى، - دەپ تولىقتىردى قانات بوزىمبايەۆ.

بۇعان دەيىن حابارلانعانداي، وقيعا ورنىنا مينيستر شىڭعىس ءارىنوۆ باردى.

اقتوبەدەن اقتاۋعا ءدارى-دارمەك جىبەرىلدى.

داۋلەت ىزتىلەۋ