الداعى ەكى جىلدا استانادا 5 مىڭ مۇعالىم قاجەت بولادى
استانا. قازاقپارات - 2029 -جىلعا دەيىن ەلوردادا 80 مەكتەپ سالىنادى. بۇل تۋرالى استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆ ايتتى.
«ەلوردادا 365544 بالانى قامتىپ وتىرعان 757 ءبىلىم بەرۋ ۇيىمى بار. ونىڭ ىشىندە 525 بالاباقشا، 172 مەكتەپ، 32 كوللەدج، 11 قوسىمشا ءبىلىم بەرۋ ۇيىمى جانە 15 ارنايى ءبىلىم بەرۋ ۇيىمى قىزمەت ەتىپ جاتىر. 2023 -جىلى ءبىلىم بەرۋ ۇيىمدارىنىڭ 102 نىسانى قوسىلدى»، - دەدى ق. سەنعازىيەۆ استانا قالاسىنىڭ كوممۋنيكاتسيالار قىزمەتىندەگى بريفينگتە.
ونىڭ ايتۋىنشا، بالالاردى مەكتەپكە دەيىنگى تاربيەمەن جانە وقىتۋمەن قامتۋدى ۇلعايتۋ ماقساتىندا 2023 -جىلى 10214 ورىنعا مەملەكەتتىك تاپسىرىس ورنالاستىرىلدى. ال بيىل تاعى 10000 نان اسا ورىنعا مەملەكەتتىك تاپسىرىس بەرىلمەك. سونىمەن قاتار، بالاباقشالارداعى ورىن تاپشىلىعىن جويۋ ماقساتىندا الداعى جىلدارى 60 بالاباقشا سالىنباق. قازىر 10 بالاباقشانىڭ جەر تەلىمدەرى بەلگىلەنىپ، جوبالاۋ جۇمىستارى باستالعان.
«استانا قالاسىندا 2023 -جىلى 11 مەكتەپ پايدالانۋعا بەرىلدى. جاڭا مەكتەپتەر قالاداعى 3 مەكتەپتىڭ ءۇش اۋسىمدىق ماسەلەسىن شەشكەن. وقۋ جىلىنىڭ اياعىنا دەيىن تاعى دا ءتورت مەكتەپتى ىسكە قوسۋ جوسپارلانعان. 2024 -جىلى 25 مەكتەپتى سالۋ ەسكەرىلگەن. ونىڭ ىشىندە جەتەۋى مەملەكەتتىك، 15 ى جايلى مەكتەپ، ۇشەۋى جەكەمەنشىك مەكتەپ بولادى. جالپى، 2028 -جىلدىڭ اياعىنا دەيىن 200 مىڭعا جۋىق ورىنعا ارنالعان 88 مەكتەپتى سالۋ جوسپارلانعان»، - دەدى باسقارما باسشىسى.
قاسىمحان سەنعازىيەۆتىڭ ايتۋىنشا، جىل سايىن مەكتەپ وقۋشىلارى سانىنىڭ وسۋىنە بايلانىستى 2026-2027 وقۋ جىلىنا قاراي استانادا 5 مىڭ مۇعالىم قاجەت بولادى.
«استانا قالاسىندا بالالاردىڭ قاۋىپسىزدىگىن ساقتاۋ ماقساتىندا بارلىق ءبىلىم بەرۋ ۇيىمدارى %100 سيفرلى بەينەباقىلاۋ كامەرالارىمەن، تۋرنيكەتتەرمەن، دابىل تۇيمەلەرىمەن جانە جوعارى جىلدامدىقتاعى ينتەرنەت جەلىسىمەن قامتاماسىز ەتىلگەن»، - دەدى ول.
