الداعى كۇندەرى اۋا رايى قانداي بولادى؟
استانا. KAZINFORM - سينوپتيكتەر 23، 24، 25-قاڭتارعا ارنالعان اۋا رايى بولجامىن جاريالادى.

اركتيكالىق سۋىق قازاقستان اۋماعىنا ىعىسىپ، الداعى ءۇش كۇندە تەمپەراتۋرا ودان ءارى تومەندەيدى.
23-24-قاڭتاردا ەلىمىزدىڭ شىعىس جانە وڭتۇستىك-شىعىس وڭىرلەرىندە سولتۇستىك-باتىس سيكلونى اسەرىن ساقتاپ قالادى، بۇل ايماقتاردا قار جاۋادى. ال قالعان اۋماقتا جاۋىن-شاشىنسىز، اشىق اۋا رايى كۇتىلەدى.
ەل بويىنشا بۇرقاسىن، ەكپىندى جەل، كوكتايعاق جانە تۇمان بولجانىپ وتىر.
«سولتۇستىك وڭىرلەردە تۇندە اۋا تەمپەراتۋراسى 20-30 گرادۋس اياز، كەي جەرلەردە 35 گرادۋسقا دەيىن قاتتى اياز بولادى، كۇندىز 13-20 گرادۋس اياز. ورتالىق پەن شىعىستا تۇندە 20-35 گرادۋس، ال كەيبىر اۋدانداردا 40 گرادۋسقا دەيىن كۇشەيەتىن قاتتى اياز كۇتىلەدى. وڭتۇستىكتە تۇندە 15-25 گرادۋس، كەيبىر جەرلەردە 28 گرادۋسقا دەيىن قاتتى اياز بولادى، كۇندىز تەمپەراتۋرا 5-15 گرادۋس اياز شاماسىندا ساقتالادى»، - دەپ جازىلعان حابارلامادا.