الداعى كۇندەرى اۋا رايى قانداي بولادى؟

استانا. قازاقپارات - سينوپتيكتەر 25، 26، 27-قىركۇيەككە ارنالعان اۋا رايى بولجامىن ۇسىندى.

الداعى كۇندەرى اتموسفەرالىق فرونتتار وتۋىنە بايلانىستى رەسپۋبليكانىڭ سولتۇستىگىندە، شىعىسىندا، وڭتۇستىك-شىعىسىندا جاۋىن-شاشىن، رەسپۋبليكامىزدىڭ وڭتۇستىك-شىعىسىنداعى تاۋلى اۋدانداردا قاتتى جاۋىن-شاشىن (جاڭبىر، قار) جاۋادى، جەل كۇشەيەدى، تۇندە اۋا تەمپەراتۋراسى 2-7 گرادۋسقا دەيىن تومەندەيدى.

رەسپۋبليكامىزدىڭ باتىسىندا، سولتۇستىك-باتىسىندا، ورتالىعىندا سولتۇستىك-باتىس انتيتسيكلون اسەرىنەن جاۋىن-شاشىنسىز اۋا رايى كۇتىلەدى. تۇنگى جانە تاڭەرتەڭگى ۋاقىتتاردا ەلىمىزدىڭ سولتۇستىگىندە، شىعىسىندا، وڭتۇستىك-شىعىسىندا تۇمان تۇسەدى.

«كۇندىز اۋا تەمپەراتۋراسى ەلىمىزدىڭ باتىسىندا 20-27 گرادۋسقا دەيىن، سولتۇستىكتە، ورتالىقتا 15-23 گرادۋسقا دەيىن، قيىر وڭتۇستىكتە 18-25 گرادۋسقا دەيىن، وڭتۇستىك-شىعىستا 12-20 گرادۋسقا دەيىن باياۋ كوتەرىلە باستايدى، ەلىمىزدىڭ شىعىسىندا اۋا تەمپەراتۋراسى 3-11 گرادۋس شاماسىندا بولادى»، - دەپ جازىلعان حابارلامادا.