الداعى كۇندەرى اۋا رايى قانداي بولادى؟

استانا. KAZINFORM – سينوپتيكتەر 7، 8، 9-قاڭتارعا ارنالعان اۋا رايى بولجامىن جاريالادى.

7-قاڭتاردان باستاپ رەسپۋبليكانىڭ باسىم بولىگىنىڭ اۋا رايىنا وڭتۇستىك-كاسپي تسيكلونى اسەر ەتەدى. سوندىقتان:

ەلدىڭ سولتۇستىك-باتىسىندا، سولتۇستىگىندە، شىعىسىندا جانە ورتالىعىندا قار، بوران، كەيدە قالىڭ قار بولجانادى؛

رەسپۋبليكانىڭ وڭتۇستىك-باتىسىندا، وڭتۇستىك جانە وڭتۇستىك-شىعىس وڭىرلەرىندە جاۋىن-شاشىن (جاڭبىر، قار) جاۋادى؛

تۇركىستان وبلىسىنىڭ تاۋلى اۋداندارىندا قاتتى جاۋىن-شاشىن (جاڭبىر، قار) كۇتىلەدى.

8-قاڭتارعا قاراعان ءتۇنى باتىس انتيتسيكلون اسەرىنەن اۋا تەمپەراتۋراسىن كۇرت تومەندەيدى:

تۇندە رەسپۋبليكانىڭ سولتۇستىك جارتىسىندا 15-25 گرادۋس ايازعا دەيىن، وڭتۇستىگىندە 5-15 گرادۋسقا دەيىن، الماتى وبلىسى مەن جەتىسۋ وبلىسىنىڭ تاۋلى اۋداندارىندا 20-25 گرادۋس ايازعا دەيىن كۇتىلەدى.

الايدا 9-قاڭتاردا تۇستەن كەيىن اۋا تەمپەراتۋراسى قايتادان كوتەرىلەدى: رەسپۋبليكانىڭ سولتۇستىك جارتىسىندا 0-5 گرادۋس ايازعا دەيىن بولسا، وڭتۇستىكتە 0-5 گرادۋس جىلى تەمپەراتۋراعا دەيىن كوتەرىلەدى.

قازاقستان بويىنشا جەل كۇشەيىپ، تۇمان ءتۇسىپ، كوكتايعاق بولادى.