الداعى كۇندەرى اۋا رايى قانداي بولادى؟

استانا. KAZINFORM - قازگيدرومەت 27-اقپان مەن 1-ناۋرىزعا ارنالعان اۋا رايى بولجامىن ۇسىندى.

الداعى كۇندەرى دە وڭتۇستىك تسيكلون ەل اۋماعىنىڭ باسىم بولىگىنە ىقپال ەتەدى، سوندىقتان بوران سوعىپ، قار جاۋادى، ەلدىڭ وڭتۇستىگىندە، وڭتۇستىك-شىعىسىندا جاڭبىر مەن قار تۇرىندە جاۋىن-شاشىن جاۋادى.

27-اقپاندا شىعىستا، تۇندە وڭتۇستىك-شىعىستىڭ تاۋلى ايماقتارىندا، 28-اقپاندا وڭتۇستىك-باتىستا، 1-ناۋرىزدا سولتۇستىك-باتىستا قاتتى قار جاۋادى.

قازاقستان بويىنشا تۇمان تۇسەدى، كوكتايعاق بولادى، جەل كۇشەيەدى، 27-اقپاندا تۇندە رەسپۋبليكانىڭ وڭتۇستىك- شىعىسىندا 30 م/س جانە ودان دا قاتتى جەل سوعادى.

«تۇندە اۋا تەمپەراتۋراسى سولتۇستىك-باتىستا، شىعىستا، ەلدىڭ ورتالىعىندا 12-28 گرادۋس ايازعا دەيىن، سولتۇستىكتە 15-25 گرادۋس ايازعا دەيىن، وڭتۇستىكتە، وڭتۇستىك-شىعىستا 1-10 گرادۋس ايازعا دەيىن، باتىستا اۋا تەمپەراتۋراسى 5-20 گرادۋس ايازعا دەيىن تومەندەيدى»، - دەپ جازىلعان حابارلامادا.