الداعى جىلدارى قانداي ماماندارعا سۇرانىس ارتادى؟
استانا. قازاقپارات - الداعى 6 جىلدا قازاقستاننىڭ ەڭبەك نارىعىنا 1,6 ميلليون كادر قاجەت بولادى. بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسقار بياحمەتوۆ مالىمدەدى.
قازاقستانعا كاسىپتىك- تەحنيكالىق سالادا ءبىلىمى بار 900 مىڭعا جۋىق ادام جانە جۇمىسشى ماماندىقتارعا يە 400 مىڭنان اسا ادام قاجەت.
«كادرلار قۇرىلىس، اۋىل شارۋاشىلىعى، وڭدەۋ ونەركاسىبى جانە دەنساۋلىق ساقتاۋ سالالارىندا بارىنشا سۇرانىسقا يە. بۇل سالالاردا جۇمىسشى ماماندىقتارعا دەگەن سۇرانىس 56 پايىزعا جەتەدى»، - دەدى بياحمەتوۆ و ك ق بريفينگىندە.
مينيسترلىك مالىمەتىنشە، قۇرىلىستا سىلاقشىلارعا، دانەكەرلەۋشىلەرگە جوعارى سۇرانىس بولادى.
اۋىل شارۋاشىلىعى سالاسىندا فەرمەرلەرگە، تراكتورشىلارعا، مال وسىرۋشىلەرگە سۇرانىس ارتپاق.
دەنساۋلىق ساقتاۋ سالاسىندا ورتا مەديتسينالىق قىزمەتكەرلەرگە، جەدەل جاردەم جۇرگىزۋشىلەرىنە جانە فەلدشەرلەرگە سۇرانىس بولادى.
سونداي-اق، تىگىنشىلەر، ونەركاسىپ جابدىقتارى سلەسارلارى، سانتەحنيكتەر قاجەت بولادى.
مينيسترلىك اقپاراتىنا سۇيەنسەك، قازاقستاندا جۇمىسشى كادرلارعا دەگەن قاجەتتىلىك تەك ارتا بەرەدى.
