الداعى دەمالىستا كۇن سۋىتىپ، قار جاۋادى

قازگيدرومەت سينوپتيكتەرى 7-9- قازان ارالىعىنا ارنالعان ءۇش كۇندىك اۋا رايى بولجامىن جاريالادى، دەپ حابارلايدى قازاقپارات.

الداعى كۇندەرى رەسپۋبليكانىڭ باسىم بولىگىندە سينوپتيكالىق جاعدايعا فرونتتار ىقپال ەتەدى.

سونىڭ سالدارىنان نايزاعاي جارقىلداپ، ەكپىندى جەل تۇرادى، جاڭبىر جاۋادى، قازاقستاننىڭ باتىسىندا بۇرشاق جاۋۋى مۇمكىن.

ەلدىڭ وڭتۇستىك-شىعىسىنداعى تاۋلى اۋدانداردا تۇنگى ۋاقىتتا جاڭبىر مەن دىمقىل قار جاۋادى.

ەلدىڭ سولتۇستىك-باتىسىندا، سولتۇستىگىندە، شىعىسىندا تۇنگى جانە تاڭەرتەڭگى ۋاقىتتا تۇمان بولادى.

ەلدىڭ كوپتەگەن ايماقتارىندا اۋا تەمپەراتۋراسى تۇندە 2-12 گرادۋس جىلى، 7- قازاندا سولتۇستىكتە جەكەلەگەن اۋدانداردا 1 گرادۋسقا دەيىن ۇسىك ساقتالادى.

كۇندىز ەلدىڭ سولتۇستىك جارتىسىندا 10-20، وڭتۇستىك جارتىسىندا - 15-27 گرادۋس جىلى بولادى.