الداعى دەمالىس كۇندەرى اۋا رايى قانداي بولادى؟

استانا. KAZINFORM — «قازگيدرومەت» سينوپتيكتەرى 18-23-قاڭتار ارالىعىنا ارنالعان اۋا رايى بولجامىن جاريالادى.

اتلانت مۇحيتىنان ىعىسقان سيكلون قازاقستان اۋماعىنداعى اۋا رايىنا ىقپال ەتەدى. سوندىقتان قار، بۇرقاسىن كۇتىلەدى، ەلىمىزدىڭ باتىسى مەن وڭتۇستىگىندە، ال 20-21-قاڭتاردا سولتۇستىك وڭىرلەردە جاڭبىر مەن قار ارالاس جاۋىن-شاشىن بولجانادى. قازاقستان بويىنشا جەل كۇشەيىپ، تۇمان ءتۇسىپ، كوكتايعاق بولادى.

18-قاڭتاردا تۇركىستان وبلىسىندا تۇندە قاتتى جاۋىن-شاشىن كۇتىلەدى.

20-قاڭتاردا ۇلىتاۋ، 21-قاڭتاردا اقتوبە، قوستاناي جانە سولتۇستىك قازاقستان وبلىستارىندا، 21-22-قاڭتاردا اقمولا وبلىسىندا، 22-قاڭتاردا پاۆلودار، قاراعاندى، تۇركىستان، جامبىل جانە اباي وبلىستارىندا قاتتى قار جاۋادى. 22-23-قاڭتاردا شىعىس قازاقستان، الماتى جانە جەتىسۋ وبلىستارىندا دا قار جاۋادى.

22-قاڭتاردان باستاپ كۇن سۋىتىپ، تۇندە تەمپەراتۋرا ايتارلىقتاي تومەندەيدى:

باتىستا تەمپەراتۋرا 10-20 گرادۋس اياز؛

سولتۇستىك-باتىس پەن سولتۇستىكتە 20-30 گرادۋس اياز؛

ورتالىق پەن شىعىستا 25-35 گرادۋس اياز؛

وڭتۇستىكتە 12-25 گرادۋس اياز بولادى؛

«ەل تۇرعىندارىن قاتتى اياز بەن سۋىق اۋا رايىنا دايىن بولۋعا شاقىرامىز»، - دەدى سينوپتيكتەر.