الداعى 5 جىلدا سۇرانىسقا يە بولاتىن كاسىپ تۇرلەرى بەلگىلى بولدى
استانا. قازاقپارات - 2030 -جىلعا قاراي كادرلارعا سۇرانىستىڭ جالپى كولەمى 1,6 ميلليون ادام بولۋى مۇكىن. ونىڭ ىشىندە 875 مىڭ ادام بىلىكتىلىك دەڭگەيى ورتا، كاسىپتىك- تەحنيكالىق ءبىلىمى بار قىزمەتكەرلەرگە تيەسىلى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.
وسى ورايدا، جۇمىسشى ماماندىقتار بويىنشا كادرلارعا قاجەتتىلىك - 403 مىڭ ادام. بۇل كورسەتكىشتى جىلدارعا باعامداساق:
جۇمىسشى ماماندارعا سۇرانىس قۇرىلىس، اۋىل شارۋاشىلىعى، وڭدەۋشى ونەركاسىپ جانە دەنساۋلىق ساقتاۋ سالالارىندا كوبىرەك بايقالادى. بۇل - شامامەن %56. اتاپ ايتقاندا:
قۇرىلىس سالاسىندا جوعارى سۇرانىسقا يە ماماندىقتار رەتىنشە كەلەسى كاسىپتەردى اتاپ وتۋگە بولادى:
سىلاقشىلار (9758 ادام)
قۇرىلىس بريگادالارىنىڭ پرورابتارى (9477 ادام)
دانەكەرلەۋشىلەر (7229 ادام) .
اۋىل شارۋالىعىندا:
فەرمەرلەرگە (10695 ادام)
تراكتورشىلار (7141 ادام)
ءىرى قارا مال ءوسىرۋ جۇمىسشىلارىنا (4940 ادام) قاجەت بولادى.
وڭدەۋشى ونەركاسىپتە:
دانەكەرلەۋشىلەر (3342 ادام)
تىگىنشىلەر مەن كيىم جوندەۋشىلەر (2606 ادام)
ونەركاسىپتىك قۇرال سلەسارلەرى (2367 ادام)
سانتەحنيكتەر مەن قۇبىر تارتۋشىلار (2051 ادام) بارىنشا سۇرانىسقا يە.
دەنساۋلىق ساقتاۋدا جوعارى سۇرانىس:
ورتا مەديتسينالىق قىزمەتكەرلەردىڭ ەڭبەگى ەلەۋلى (24614 ادام)
جەدەل جاردەم جۇرگىزۋشىلەرىنە دە سۇرانىس جوعارى (4604 ادام)
فەلدشەرلەرگە دە سۇرانىس از ەمەس (4536 ادام) .
تۇراقتى جۇمىسپەن قامتۋ دەڭگەيى قانداي؟
حالىقتى جۇمىسپەن قامتۋ - كەز كەلگەن مەملەكەتتىڭ الەۋمەتتىك-ەكونوميكالىق دامۋىنىڭ نەگىزگى كورسەتكىشتەرىنىڭ ءبىرى. بۇل ماسەلەنىڭ دۇرىس شەشىلۋى حالىقتىڭ ءال-اۋقاتىن ارتتىرىپ، ەكونوميكالىق تۇراقتىلىقتى قامتاماسىز ەتەدى. قازاقستاندا دا ەڭبەك نارىعىن دامىتۋ، جۇمىسسىزدىق دەڭگەيىن تومەندەتۋ جانە حالىقتى تۇراقتى جۇمىسپەن قامتاماسىز ەتۋ - باستى باسىمدىقتاردىڭ ءبىرى.
- قازاقستاندا جۇمىسپەن قامتۋ سالاسى ۇنەمى دامىپ كەلەدى. ۇكىمەت بۇل ماقساتتا ءتۇرلى باعدارلاما قابىلداپ، كاسىپكەرلىكتى دامىتۋعا جانە جاڭا ءارى تۇراقتى جۇمىس ورىندارىن اشۋعا جاعداي جاساپ وتىر. حالىقتى جۇمىسپەن قامتۋ ءۇشىن اۋەلى جۇمىسسىز رەتىندە تىركەلگەندەردى بەلگىلى ءبىر سالاعا بەيىمدەۋ كەرەك. قىسقا مەرزىمدى وقىتۋ كۋرستارىنان وتكىزۋ ماڭىزدى، - دەيدى مينيسترلىكتەگىلەر.
وسى رەتتە حالىقتى جۇمىسپەن قامتۋعا جاردەمدەسۋ ءىس- شارالارىن ىسكە اسىرۋدا مانساپ ورتالىقتارىنىڭ ەڭبەگى زور. ولار كاسىپتىك وقىتۋدى ۇيىمداستىرادى. كاسىپتىك وقىتۋ جۇمىسسىزداردىڭ بەلگىلى ءبىر جۇمىس ءتۇرىن ورىنداۋ ءۇشىن قاجەتتى جاڭا نەمەسە وزگەرتىلگەن كاسىپتىك داعدىلاردى تەزدەتىپ الۋعا باعىتتالعان جانە ول كاسىپتىك دايارلاۋدى، قايتا دايارلاۋدى جانە بىلىكتىلىكتى ارتتىرۋدى قامتيدى.
بۇگىنگى كۇنى جۇمىسسىزدارعا كاسىپتىك وقىتۋدىڭ مىناداي تۇرلەرى ۇسىنىلادى:
شاكىرتاقى، جول جۇرۋگە جانە تۇرۋعا ماتەريالدىق كومەك تولەي وتىرىپ، جۇمىسسىزداردى ءبىلىم بەرۋ ۇيىمدارىندا كاسىپتىك وقىتۋ. ءبىلىم بەرۋ ۇيىمدارى «اتامەكەن» ۇكپ- نىڭ وقۋ ورىندارى مەن وقۋ ورتالىقتارىنىڭ تىزىلىمىنەن ايقىندالادى
اي سايىن جالاقى تولەي وتىرىپ، جۇمىسسىزداردى جۇمىس بەرۋشىدەگى جۇمىس ورنىندا تالىمگەرلەر ارقىلى كاسىپتىك وقىتۋ
Skills.Enbek پورتالىندا سۇرانىسقا يە داعدىلارعا ونلاين وقىتۋ.
ايتا كەتۋ كەرەك، جۇمىس بەرۋشىلەردىڭ ءوتىنىشى ارقىلى ءبىلىم العان ازاماتتاردى ۇسىنۋشى تاراپ تۇراقتى جۇمىسپەن قامتۋعا مىندەتتى. بۇل پروتسەسس بەلگىلى ءبىر كەلىسىمشارت نەگىزىندە جۇزەگە اسىرىلادى.
- Skills.Enbek پورتالىنداعى ونلاين وقۋ ولار جاڭا داعدى مەڭگەرگىسى نەمەسە بىلىكتىلىگىن ارتتىرعىسى كەلەتىن كەز كەلگەن ازاماتقا قولجەتىمدى. بۇگىنگى كۇنى Skills.Enbek پورتالىندا 859 كۋرس بار، ونىڭ ىشىندە جۇمىسشى كاسىپتەر بويىنشا 160 كۋرس. ونلاين كۋرستار جاڭا داعدى العىسى كەلەتىن نەمەسە بىلىكتىلىگىن ارتتىرعىسى كەلەتىن كەز كەلگەن ادامعا قولجەتىمدى، - دەيدى حالىقتى جۇمىسپەن قامتۋ دەپارتامەنتىنىڭ ديرەكتورى ازيز يبراگيموۆ.
جاۋاپتى مينيسترلىك 2025 -جىلى Skills.Enbek پورتالىنداعى كۋرستاردىڭ تىزبەسىن VR/AR ۆيرتۋالدى جانە قوسىلعان شىندىق تەحنولوگيالارىن پايدالانا وتىرىپ جاڭا ءبىلىم بەرۋ باعدارلامالارىمەن تولىقتىرۋدى جوسپارلاپ وتىر.
2024-جىلدىڭ قورىتىندىسى بويىنشا 67,5 مىڭ جۇمىسسىز ءۇشىن قىسقا مەرزىمدى كاسىپتىك وقىتۋ كۋرستارى ۇيىمداستىرىلعان. ونىڭ ىشىندە:
ءبىلىم بەرۋ ۇيىمدارىندا - 7,8 مىڭ ادام
جۇمىس بەرۋشىدەگى جۇمىس ورنىندا - 1,9 مىڭ ادام
Skills.Enbek ونلاين وقىتۋ - 57,7 مىڭ جاڭا مامان يەسى اتاندى.
بىلتىر جۇمىس بەرۋشىلەردىڭ وتىنىمدەرى بويىنشا ءبىلىم بەرۋ ۇيىمدارىنا جانە جۇمىس بەرۋشىلەرگە كاسىپتىك وقىتۋعا جىبەرىلگەن 9,7 مىڭ ادامنىڭ ىشىنەن وقۋدى 8,5 مىڭ ادام اياقتادى. سونىڭ 7,4 مىڭى نەمەسە %87,2 ى جۇمىسقا ورنالاسقان.
ءبىلىم بەرۋ باعدارلامالارىنىڭ الەۋەتى
اتالعان ءبىلىم بەرۋ باعدارلاماسىنىڭ ءبىرى رەتىندە «JOLTAP» جوباسىن اتاپ وتۋگە بولادى. 2023 -جىلدىڭ كۇزىندە ىسكە قوسىلعان جوبا اياسىندا وسى ۋاقىتقا دەيىن 9 مىڭ ادام قىسقا مەرزىمدى وقۋ كۋرسىنان وتكەن. نەگىزگى ماقسات - حالىقتىڭ ءال- اۋقاتىن كوتەرۋ. ءبىلىم الۋ تەگىن.
قالا تۇرعىنى ساۋلە قۇسماننىڭ نەگىزگى ماماندىعى قارجىگەر. ءبىراق، ۇزاق جىلدار بويى بالا كۇتىمىمەن ۇيدە وتىرعاندىقتان، ديپلومىنىڭ يگىلىگىن كورە الماعان. ەندى ۇل- قىزى ەر جەتكەن سوڭ، ءوزىن باسقا سالادا سىناپ كورمەككە بەل بايلاعان. وسىلايشا، بارشاعا مۇمكىندىك ءمودۋلدى كەشەنىنە كەلىپ، كۋرستان ءوتىپ، جاڭا مامان يەسى اتانىپتى.
- مەن جەلتوقسان ايىندا تىگىنشىلىك جانە سانگەر قۇراستىرۋشى ماماندىعىن وقىدىم. تىگىنشىلىك جانىما جاقىن. سوندىقتان كاسىبي تۇردە بۇل ماماندىقتى مەڭگەرۋدى ءجون سانادىم. بىزگە بىلىكتى ماماندار ءدارىس وقىدى. قىسقا مەرزىمدى كۋرستان بىلگەن- تۇيگەنىمىز كوپ. ەندى وسى سالادا ەڭبەك ەتۋدى كوزدەپ وتىرمىن. ءوزىم ۇزاق جىلدار بويى دەكرەتتىك دەمالىستا بولعاندىقتان، جۇمىس ىستەۋگە دەگەن قۇلشىنىسىم جوعارى. وقۋ بارىسىندا ەلدەگى بەدەلدى كاسىپورىندارمەن تانىستىق. الداعى ۋاقىتتا سولارمەن كەلىسىمشارت جاساسىپ، كاسىپ باستايمىن دەگەن ويىم بار، - دەيدى ول.
العاشقىدا سيفرلىق ءبىلىمدى دامىتۋ باعىتىندا قولعا الىنعان جوبا كەيىن ازاماتتاردىڭ سۇرانىسى بويىنشا جۇمىسشى ماماندىقتاردى دا تىزىمگە قوسقان. جالپى 17 ماماندىق بويىنشا ءبىلىم بەرەدى. وقۋ مەرزىمى 3 كۇننەن 25 كۇنگە دەيىن. جوباعا 18 بەن 50 جاس ارالىعىنداعى جۇمىسسىز تۇلعالار قاتىسا الادى. قازىر استانا قالاسى بويىنشا 5 جەردە مودۋلدىك كەشەن جۇمىس ىستەيدى. بۇل جەردەگى كەڭەسشىلەر كەلۋشىلەرگە جوبا تۋرالى تولىق اقپارات ۇسىنىپ، وتىنىشتەرىن قابىلدايدى. ايتپاقشى، ماماندار بۇدان بولەك، الەۋمەتتىك باعىت بويىنشا دا سۇراقتارعا جاۋاپ بەرەتىندىگىن ايتادى.
- ءبىز وسى جەردە كەلۋشىلەردى قىسقا مەرزىمدى وقۋلارعا تىركەيمىز. الەۋمەتتىك سۇراقتار بويىنشا دا اقپارات بەرەمىز. جۇمىسقا تۇرۋ، ءۇي كەزەگىنە تۇرۋ سىندى ماسەلەلەر بويىنشا دا قىزمەتتەرىمىزدى ۇسىنامىز. كەلۋشىلەر كوپ. كۇنىنە شامامەن 15-20 ادامعا دەيىن قىزمەت كورسەتەمىز، - دەيدى «بارشاعا مۇمكىندىك» مودۋلدىك كەشەنىنىڭ كەڭەسشىسى گۇلدانا دوسبول.
ايتپاقشى، قالا ءىشىن ارالاي ءجۇرىپ، «بارشاعا مۇكىندىك» ءمودۋلدى كەشەندەرىنىڭ جابىق تۇراتىندىعىن كوزىمىز شالعان ەدى. ارنايى بارىپ، تەكسەرىپ كوردىك. سويتسەك، بۇل ورتالىقتاردىڭ ارنايى بەلگىلەنگەن ۋاقىتى بار ەكەن. 10:00 مەن 17:00 ارالىعىندا جۇمىس ىستەيدى. جاۋاپتىلاردىڭ سوزىنشە، اشىلعالى بەرى ەكى جىلدىڭ ىشىندە كوپتىڭ كوڭىلىنەن شىعىپ ۇلگەرگەن. ماسەلەن، بۇگىندە بۇل جوباسى ارقىلى ءبىلىم العان 7 مىڭ ادام جۇمىسقا ورنالاسىپ، مىڭنان استامى ءوز كاسىپتەرىن اشقان.
الداعى ۋاقىتتا قانداي جاڭا ماماندىقتار پايدا بولادى؟
وسىدان 5 جىل بۇرىن ەڭبەك جانە الەۋمەتتىك قورعاۋ مينيسترلىگى كاسىپتەر مەن قۇزىرەتتەردىڭ اتلاسىن ازىرلەگەن. اتلاستا ەكونوميكانىڭ نەگىزگى 9 سالاسى قامتىلعان جانە وندا وسى 9 سالادا جاڭادان پايدا بولاتىن، ترانسفورماتسيالاناتىن، سونداي-اق جويىلاتىن كاسىپتەر مەن قۇزىرەتتەردىڭ تىزبەسى كورسەتىلگەن.
كاسىپتەر مەن قۇزىرەتتەردىڭ اتلاسى:
ازاماتتارعا كەلەشەكتە كاسىپتىڭ پەرسپەكتيۆالى بولۋىن ەسكەرە وتىرىپ، ماماندىقتى دۇرىس تاڭداۋعا
ءبىلىم بەرۋ ۇيىمدارىنا قازاقستاندىقتاردى جاڭا داعدىلار مەن قۇزىرەتتىلىكتەرگە وقىتۋ قاجەتتىلىگىن ەسكەرە وتىرىپ، ءبىلىم بەرۋ جوسپارلارىن وزەكتەندىرۋگە مۇمكىندىك بەرەدى.
اتلاسقا سايكەس كەلەشەكتە قازاقستاندا مىناداي جاڭا ماماندىقتار پايدا بولۋى ىقتيمال.
اۋىل شارۋاشىلىعىندا:
2025 -جىلى اگرونوم- ەكونوميست جانە يننوۆاتسيالىق بيوپرەپاراتتار تەحنولوگى
2025-2030 -جىلدارى اۋىل شارۋاشىلىعى ءوندىرىسىن اۆتوماتتاندىرۋ جانە روبوتتاندىرۋ جونىندەگى ينجەنەر (اگروينفورماتيك) جانە روبوتوتەحنيكا وپەراتورى
قۇرىلىستا:
2025 -جىلى سيفرلىق جوبالاۋشى
2025-2030 -جىلدارى - ەنەرگيا ۇنەمدەۋ تەحنولوگيالارىنىڭ ينجەنەرى
2030-2035 -جىلدارى روبوتوتەحنيكا جونىندەگى تەحنيك جانە ەكولوگيالىق قۇرىلىس ماتەريالدارىن ازىرلەۋ جونىندەگى ينجەنەر- تەحنولوگ
تاۋ- كەن مەتاللۋرگياسىندا:
2025 -جىلى بلوكچەين جەلىلەرىنىڭ اكىمشىلەرى، جابدىقتى جوندەۋ جانە جاڭعىرتۋ جونىندەگى سۋپەرۆايزەر جانە لوگيستيكالىق اعىنداردى وڭتايلاندىرۋ مەنەدجەرى
2030 -جىلى جابدىقتى جاڭارتۋ ينجەنەرى سياقتى ماماندىقتار پايدا بولادى.
ايتا كەتسەك، جۋىردا پرەمەر- ءمينيستردىڭ ورىنباسارى ەرمەك كوشەربايەۆ سەناتتا وتكەن پارلامەنتتىك تىڭداۋدا جۇمىسشى ماماندىق يەلەرىنىڭ ايلىعى تۋرالى دەرەكتەر كەلتىردى.
زۇلقارناي ەرمۇرات ۇلى
