الداعى 5 جىلدا جول بويلارىندا موتەل تۇرىندەگى 60 قوناق ءۇي پايدا بولادى
استانا. قازاقپارات - 2029 -جىلعا دەيىن جول بويلارىندا موتەل تۇرىندەگى 60 قوناق ءۇي پايدا بولادى. حالىقارالىق فرانشيزا نەگىزىندە سالىناتىن بۇل نىسانداردا جاتىن ورىن، TIR تۇراعى، جانارماي بەكەتتەرى بولادى.

كولىك ءمينيسترى مارات قارابايەۆ ۇكىمەت وتىرىسىندا بيىل 4 مىڭ شاقىرىم جول اقىلى بولاتىنىن ءمالىم ەتتى.
- جول بويىنداعى زاماناۋي سەرۆيستىك وبەكتىلەردى قالىپتاستىرۋ ءۇشىن QazaqOil ،RoyalPetrol جانە Compass سياقتى ءىرى ينۆەستورلار 400 دەن استام نىسان سالۋدى جانە مودەرنيزاتسيالاۋدى جوسپارلاپ وتىر.
سونىمەن قاتار Petro Retail كومپانياسى جول بويىنداعى سەرۆيس نىساندارىنىڭ جۇيەسىن قۇرادى. 2029 -جىلعا دەيىن 60 كەشەندى نىساننىڭ قۇرىلىسى جوسپارلانعان. ونىڭ 10 ى بيىل جۇزەگە اسىرىلادى، - دەدى ول.
اتالعان جوباعا 120 ميلليارد تەڭگە ينۆەستيسيا تارتىلماق.
- اتالعان كومپانيا ەلىمىزدە ءبىرىنشى رەت حالىقارالىق فرانشيزا نەگىزىندە موتەل تۇرىندەگى قوناقۇيلەر جۇيەسىن قالىپتاستىرادى. ياعني، جاتىن ورىن، TIR تۇراعى، جانارماي بەكەتتەرى جانە جۇرگىزۋشىلەر مەن تۋريستەرگە ارنالعان ءبىرىڭعاي سەرۆيستىك قاراستىرىلعان، - دەدى مارات قارابايەۆ.
بۇعان دەيىن بيىل ەلدەگى اۆتوجولداردىڭ اقىلى ۋچاسكەلەرىندەگى تاريفتەر ورتا ەسەپپەن 30 پايىزعا ءوسۋى جوسپارلانعانى ءمالىم بولعان ەدى.
ايتا كەتەيىك، موتەل(اعىلش. 'motel' ،motor - قوزعالتقىش دەگەن سوزىنەن، اۆتوموبيل جانە hotel - قوناق ءۇي، وتەل) - ماگيسترالدىق اۆتوموبيل جولدارىنىڭ بويىنا ارنايى سالىناتىن قوناق ءۇي كەشەنى. موتەلدەر نەگىزىنەن ءىرى قالالار مەن كۋرورتتىق ورىندارعا تاياۋ جولداردىڭ بويىنا سالىنادى. موتەلدىڭ قۇرامىنا قوناق ۇيمەن قاتار تىنىعۋ ورىندارى مەن بولمەلەرى، اسحانا مەن مەيرامحانا، تۇرمىستىق، بايلانىس، ت. ب. قىزمەت كورسەتۋ تۇرلەرى، جانار ماي قۇيۋ ورىندارى، تەحنيكالىق قىزمەت كورسەتۋ ستانسيالارى، كولىكتەر تۇراتىن الاڭدار، قىزمەتكەرلەرگە جانە ءتۇرلى شارۋاشىلىققا ارنالعان ۇيلەر كىرەدى.