العىسىمىز شەكسىز. ب ق و-دا سۋ تاسقىنىنان زارداپ شەككەن تۇرعىندارعا باسپانا بەرىلىپ جاتىر
ورال. KAZINFORM - مەملەكەت باسشىسىنىڭ تاپسىرماسىنا سايكەس باتىس قازاقستان وبلىسى اۋداندارىندا سۋ تاسقىنىنان زارداپ شەككەن تۇرعىندارعا باسپانا بەرىلىپ جاتىر.
بايتەرەك اۋدانىندا 2، تەرەكتىدە 5 وتباسى جاڭا قونىسقا كوشتى. بايتەرەك اۋدانى دوستىق اۋىلىنىڭ تۇرعىنى اقمارال سلامعالي قىزىنىڭ باسپاناسى سۋ تاسقىنى سالدارىنان جارامسىز بولىپ قالعان. بۇگىندە اقمارال سلامعالي قىزى جاڭا ۇيىنە قونىستاندى.
«ءۇش بولمەلى ءۇيىم سۋعا كەتكەن ەدى. قورقىنىشتى ۋاقىتتى باستان كەشىردىك. الايدا پرەزيدەنتتىڭ «دالادا قالمايسىزدار» دەگەن ءسوزى بىزگە ۇلكەن ءۇمىت بەردى. العىسىمىز شەكسىز. مىنە، بۇگىن باسپانالى بولىپ وتىرمىز»، - دەدى ول.
سونىمەن قاتار ورال قالاسىنا ىرگەلەس ورنالاسقان تەرەكتى اۋدانىنا قاراستى پودستەپنىي اۋىلىنىڭ تۇرعىندارى دا باسپاناعا قول جەتكىزە باستادى.
جۇرگىزىلگەن تەحنيكالىق زەرتتەۋ ناتيجەسىندە پودستەپنىي اۋىلى بويىنشا 116 تۇرعىن ءۇي جارامسىز دەپ تانىلعان. قازىرگى تاڭدا 106 ءۇيدىڭ قۇرىلىسى باستالسا، 10 تۇرعىن ءۇي ساتىپ الىنىپ جاتىر. باسپاناسى سۋدا قالعان جانداردىڭ ءبىرى - ايگۇل كەڭەسوۆا. ول العاشقىلاردىڭ ءبىرى بولىپ، جاڭا پاتەرىنىڭ كىلتىن الدى.
«مەن وسى اۋىلدىڭ تۇرعىنىمىن. سۋ تاسقىنى كەزىندە جالعىز ءۇيىم سۋعا كەتتى. بۇل ماسەلە كۇزگە دەيىن سوزىلىپ كەتە مە دەگەن قورقىنىش بولعان ەدى. الايدا اكىمدىك از عانا ۋاقىتتا بىزگە پاتەر ساتىپ اپەرۋگە ىقپال ەتتى. وسىلايشا، بۇگىن قونىس تويىن تويلاپ جاتىرمىز. مەملەكەت باسشىسىنا العىسىمدى بىلدىرەمىن»، - دەدى ايگۇل كەڭەسوۆا.
ەسكە سالا كەتەيىك، بۇدان بۇرىن ورالدا جالعىز باسپاناسى اپاتتى دەپ تانىلعان ساياجاي تۇرعىندارىنا پاتەر بەرىلە باستاعانىن جازعان بولاتىنبىز.
اۆتور
عايساعالي سەيتاق
