العىس ايتۋ كۇنى الەم ەلدەرىندە قالاي تويلانادى

استانا. KAZINFORM - العىس ايتۋ كۇنى ەرەكشە تاريحىمەن قازاق ەلىنىڭ اجىراماس بولىگىنە اينالدى. بۇل كۇنى ءتۇرلى ەتنوس وكىلدەرى، جاستار مەن اقساقالدار باس قوسادى. Kazinform اگەنتتىگىنىڭ ءتىلشىسى بۇل مەرەكە الەمنىڭ تاعى قاي ەلىندە اتالىپ وتەتىنىن انىقتادى.

ءار حالىقتىڭ وزىنە ءتان بىرلىك بەلگىلەرى بولادى. كوپۇلتتى قازاقستان ءۇشىن بۇل ءارقاشان دوستىق، بەيبىتشىلىك پەن كەلىسىم. جاقىنىڭا كومەكتەسۋ جانە جاناشىرلىق تانىتۋ ءومىر ءسۇرۋ سالتى جانە ۇرپاقتان ۇرپاققا ساباقتاسىپ كەلە جاتقان بىرىكتىرۋشى فاكتورعا اينالعان.

عاسىرلار بويى قازاقستان جۇزدەگەن حالىقتىڭ مەكەنىنە اينالىپ، ولار تاۋەلسىز مەملەكەت قۇرۋ ءۇشىن بىرگە ءومىر ءسۇرۋدى ۇيرەندى.

العىس ايتۋ كۇنىن قۇرۋ يدەياسى، ارينە، جاڭاشىلدىق ەمەس. مۇنداي مەرەكەنى جەر شارىنىڭ تۇكپىر-تۇكپىرىنەن كەزدەستىرۋگە بولادى. ارينە، ەڭ ءبىرىنشى ويعا اقش پەن كانادادا اتالىپ وتەتىن Thanksgiving Day ەسكە تۇسەدى. ا ق ش-تا بۇل كۇن قاراشانىڭ سوڭعى بەيسەنبىسىندە، ال كانادادا قازاننىڭ ەكىنشى دۇيسەنبىسىندە اتالىپ وتەدى. اتالعان ەلدەردە مەرەكەنىڭ تاريحى بايىرعى حالىقتارعا جاڭا الەمدە امان قالۋعا كومەكتەسكەنى ءۇشىن جانە ەگىن جيناعان قۇدايعا العىسىن بىلدىرگەن العاشقى قونىستانۋشىلاردىڭ تاريحىمەن تىعىز بايلانىستى. بۇل كۇنى امەريكالىقتار مەن كانادالىقتار وتباسىلارىنا، جاقىندارىنا جانە دوستارىنا العىس بىلدىرەدى.

برازيليادا دا وسىنداي مەرەكە بار - «ديا دە اچاو دە گراساس»، بۇل دا العىس ايتۋ كۇنىن بىلدىرەدى. ولار ونى امەريكالىق مەرەكەگە ۇقساس قاراشانىڭ سوڭعى بەيسەنبىسىندە اتاپ وتەدى. مەرەكەدە برازيليالىقتار قۇدايعا، وتباسىنا، دوستارىنا جانە ارىپتەستەرىنە كومەكتەرى مەن قولداۋلارى ءۇشىن العىس ايتادى.

تاعى ءبىر ۇقساس مەرەكە - نەمىستەردىڭ «Erntedankfest» مەرەكەسى. ول - قازان ايىنىڭ باسىندا وتەتىن جانە حريستيان داستۇرلەرىمەن بايلانىستى ەگىنگە العىس ايتۋ مەرەكەسى. بۇل كۇنى ادامدار شىركەۋلەردى جينالعان جەمىستەرمەن بەزەندىرىپ، قايىرىمدىلىق شارالارىن وتكىزەدى.

جاپونيالىقتار «Kinrō Kansha no Hi» نەمەسە ەڭبەكتى باعالاۋ كۇنىن اتاپ وتەدى. ول 23-قاراشادا تويلانادى. مەرەكە ەڭبەكشىلەردى قۇرمەتتەۋ كۇنى رەتىندە باستاۋ الىپ، ەلدىڭ ەگىنشىلىك داستۇرلەرىنەن تامىرى تەرەڭدە جاتىر. بۇل كۇنى باستىقتار قاراماعىنداعىلاردى قۇتتىقتايدى جانە ادامدار توپتارعا جينالىپ، مۇعالىمدەرى مەن تالىمگەرلەرىنە العىس ايتادى.

وڭتۇستىك كورەيادا دا وسىنداي مەرەكە بار - چحۋسوك. بۇل ەلدەگى باستى مەرەكەلەردىڭ ءبىرى جانە ول 8- ايدىڭ 15- كۇنى تويلانادى. ادەتتە بۇل كۇن قىركۇيەك نەمەسە قازان ايىنىڭ باسىنا كەلەدى.

بۇل كۇنى كارىستەر اتا-بابالارىنا قۇرمەت كورسەتىپ، وتباسىنا، تۋعان-تۋىستارىنا، دوستارىنا العىس بىلدىرەدى. وتباسىلار باس قوسىپ، اتا-اناسىنىڭ بەيىتتەرىنە زيارات ەتىپ، ەسكە الۋ راسىمدەرىن جاساپ، ءداستۇرلى تاعامدارمەن مەرەكەلىك داستارحان جايادى.

قىتايدا «كۇز ورتاسى فەستيۆالى» وتەدى. وندا ادامدار اتا-بابالارىنا، وتباسى مۇشەلەرىنە جانە دوستارىنا قولداۋى مەن قامقورلىعى ءۇشىن العىس بىلدىرەدى.

بۇل ەلدەردىڭ بارلىعىندا مەرەكەنىڭ تامىرى مەن ءداستۇرى ءارتۇرلى بولعانىمەن، نەگىزگى يدەياسى وزگەرىسسىز - ومىرگە ريزاشىلىق، مەيىرىمدىلىك پەن ءبىر-بىرىنە قولداۋ كورسەتۋ.

العىس كۇنىنە وراي الماتى مەن استانادا وتەتىن ءىس-شارالار تۋرالى بۇعان دەيىن جازعان بولاتىنبىز.

اۆتور

ەركەجان سماعۇلوۆا