العاشقى جاعداي انىقتالدى: دەنساۋلىق ساقتاۋ مينيسترلىگى قازاقستاندىقتارعا ەسكەرتۋ جاسادى

سونىمەن قاتار سوڭعى اپتادا جەدەل رەسپيراتورلىق ۆيرۋستىق ينفەكسيالارمەن (ج ر ۆ ي) سىرقاتتانۋشىلىق 10 پايىزعا تومەندەدى. تۇماۋعا قارسى ۆاكسيناتسيالاۋ ناۋقانى باستالعالى بەرى 240 مىڭنان استام ادام ەكپە الدى. بۇل تۋرالى ق ر دەنساۋلىق ساقتاۋ مينيسترلىگى حابارلادى.

ەپيدەميولوگيالىق مونيتورينگ دەرەكتەرىنە سايكەس تۇماۋدىڭ ءۇش جاعدايى استانا قالاسىندا، ەكەۋى ماڭعىستاۋ وبلىسىندا انىقتالعان. زەرتحانا جاعدايىندا بارلىعى 834 سىناما زەرتتەلىپ، ونىڭ بەسەۋىنەن تۇماۋ ۆيرۋسى تابىلدى.

سوڭعى ەسەپتى اپتانىڭ ىشىندە ەلدە 127266 ج ر ۆ ي جاعدايى تىركەلدى. الدىڭعى اپتادا بۇل كورسەتكىش 140273 بولعان. قىركۇيەك ايىنىڭ باسىنان بەرى ج ر ۆ ي- دىڭ 760182 جاعدايى انىقتالدى.

- زەرتحانالىق مونيتورينگ باسقا دا رەسپيراتورلىق ۆيرۋستاردىڭ تارالۋىن راستادى. اتاپ ايتقاندا، رينوۆيرۋستىق ينفەكسيانىڭ – 68، ماۋسىمدىق كوروناۆيرۋستىق ينفەكسيالاردىڭ – 47، بوكاۆيرۋستىق ينفەكسيانىڭ – 50، پاراگريپتىڭ – 32، ادەنوۆيرۋستىق ينفەكسيانىڭ – 27، رەسپيراتورلىق-سينتسيتيالدى ينفەكسيانىڭ - 2 جانە مەتاپنيەۆموۆيرۋستىق ينفەكسيانىڭ 1 جاعدايى انىقتالدى، - دەلىنگەن د س م حابارلاماسىندا.

حالىقتى تۇماۋعا قارسى تەگىن ۆاكسيناتسيالاۋ ءۇشىن «گريپپول®️ پليۋس» ۆاكسيناسىنىڭ 2,1 ميلليون دوزاسى ساتىپ الىندى. ونىڭ قۇرامى دۇنيەجۇزىلىك دەنساۋلىق ساقتاۋ ۇيىمىنىڭ 2026-2027-جىلدارداعى ەپيدەميالىق ماۋسىمعا ارنالعان ۇسىنىمدارىنا سايكەس كەلەدى. ۆاكسينا ەلىمىزدىڭ بارلىق وڭىرىنە جەتكىزىلدى.

8-قازانداعى جاعداي بويىنشا تۇماۋعا قارسى ەكپەنى 240375 ادام الدى.

- ءبىرىنشى كەزەكتە تەگىن ۆاكسيناتسيالاۋ قاۋىپ توپتارىنا جۇرگىزىلەدى. ولاردىڭ قاتارىندا مەديتسينا قىزمەتكەرلەرى، جۇكتى ايەلدەر، ديسپانسەرلىك ەسەپتە تۇرعان بالالار، جەتىم بالالار، مەديتسينالىق-الەۋمەتتىك مەكەمەلەردە تۇراتىن ادامدار مەن وسى مەكەمەلەردىڭ قىزمەتكەرلەرى، سونداي-اق ەپيدەميولوگيالىق كورسەتىلىمدەر بويىنشا باسقا دا ساناتتاعى ازاماتتار بار، - دەلىنگەن حابارلامادا.

دەنساۋلىق ساقتاۋ مينيسترلىگى ۆاكسيناتسيالاۋ ءۇشىن قازان ايى قولايلى كەزەڭ ەكەنىن ەسكە سالادى. سەبەبى ەكپەدەن كەيىن يممۋندىق قورعانىستىڭ قالىپتاسۋىنا شامامەن ەكى اپتا قاجەت.

ۆاكسيناتسيالاۋ تۇماۋدىڭ اۋىر ءوتۋ جانە اسقىنۋ قاۋپىن تومەندەتۋگە كومەكتەسەدى.

- سونىمەن قاتار قاراپايىم پروفيلاكتيكالىق شارالاردى ساقتاۋ ۇسىنىلادى: قولدى ۇنەمى جۋۋ، بولمەلەردى جيى جەلدەتۋ جانە ناۋقاس ادامدارمەن تىعىز قارىم-قاتىناستان اۋلاق بولۋ.

دەنە قىزۋى كوتەرىلىپ، جوتەل، تاماق اۋرۋى نەمەسە رەسپيراتورلىق ينفەكسيانىڭ باسقا دا بەلگىلەرى پايدا بولعان جاعدايدا ۇيدە قالىپ، ۋاقىتىلى مەديتسينالىق كومەككە جۇگىنۋ جانە ءوزىن-ءوزى ەمدەۋمەن اينالىسپاۋ قاجەت، - دەلىنگەن حابارلامادا.

ەسكە سالساق ەلدە ەمحانالاردىڭ جۇمىسىن باعالاۋ جۇيەسى وزگەرەتىنى تۋرالى جازعان ەدىك.