العاشقى ا ە س قۇرىلىسى قاشان باستالادى؟

استانا. KAZINFORM - ەنەرگەتيكا ءمينيسترى الماسادام ساتقاليەۆ قازاقستاندا العاشقى اتوم ەلەكتر ستانتسياسى قاشان سالىناتىنى تۋرالى ساۋالعا جاۋاپ بەردى.

ەنەرگەتيكا مينيسترلىگىندە وتكەن بريفينگ بارىسىندا جۋرناليستەردىڭ سۇراقتارىنا جاۋاپ بەرگەن ساتقاليەۆ بولجامدى مەرزىمدى اتادى، ياعني 2-3 جىل.

«حالىقارالىق تاجىريبەدە جوبالاۋ مەرزىمى ءۇش جىلعا دەيىن سوزىلادى. جالپى قۇرىلىس جۇمىستارى تۋرالى ايتار بولساق، وندا ەكى جىل ىشىندە قۇرىلىسقا كىرىسەتىن شىعارمىز. الايدا نەگىزگى نىساننىڭ قۇرىلىسى تەحنيكالىق-ەكونوميكالىق نەگىزدەمە اياقتالعان سوڭ، جوبالىق قۇجاتتامانى دايىنداعاننان، مەملەكەتتىك ورگانداردان بارلىق قاجەت رۇقساتتى العاننان كەيىن عانا باستالادى»، - دەپ ءتۇسىندىردى ەنەرگەتيكا مينيسترلىگىنىڭ باسشىسى.

ايتا كەتەيىك، جۋىردا قازاقستاندا ءبىرىنشى اتوم ەلەكتر ستانتسياسىنىڭ ورنى رەسمي تۇردە بەكىتىلدى. ال بۇعان دەيىن مينيسترلىك اتوم ەلەكتر ستانتسيالارىن سالۋ تەحنولوگيالارىن الەۋەتتى جەتكىزۋشىلەرمەن باسەكەلەستىك ديالوگىن اياقتاعانىن مالىمدەدى.

«روساتوم» مەملەكەتتىك كورپوراتسياسى، KHNP (كورەيا)، CNNC (قىتاي) جانە EDF (فرانسيا) كومپانيالارى قازاقستاندا اتوم ەلەكتر ستانتسياسىن سالۋ ءۇشىن تەحنولوگيالاردى الەۋەتتى جەتكىزۋشىلەردىڭ قىسقا تىزىمىنە ەندى»، - دەپ جازىلعان بۇعان دەيىنگى حابارلامادا.