العاش رەت قازاقستاندىق لوندوننىڭ قۇرمەتتى مۋزىكانتتار قاۋىمداستىعىنىڭ كۇمىس مەدالىن يەلەندى
استانا. KAZINFORM - بولاشاق ستيپەندياتى راحات-ءبي ءابدىساعين لوندوننىڭ قۇرمەتتى مۋزىكانتتار قاۋىمداستىعىنىڭ كۇمىس مەدالىن يەلەندى، دەپ حابارلايدى عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى.
«بولاشاق» باعدارلاماسىنىڭ ستيپەندياتى راحات-ءبي ءابدىساعين 2024-جىلى لوندوننىڭ قۇرمەتتى مۋزىكانتتار قاۋىمداستىعىنىڭ بەدەلدى كۇمىس مەدالىن العان العاشقى قازاقستاندىق اتاندى. بۇل ۇلى بريتانيانىڭ ەڭ كونە جانە ماڭىزدى ماراپاتتارىنىڭ ءبىرى. سالتاناتتى ماراپاتتاۋ ءراسىمى قاراشا ايىنىڭ ورتاسىندا ۇلى بريتانيا استاناسىندا ءوتتى.
1889-جىلى نەگىزى قالانعان كۇمىس مەدال جىل سايىن ۇلى بريتانيانىڭ جەتەكشى كونسەرۆاتوريالارىنىڭ ەڭ ۇزدىك جاس مۋزىكانتتارىنا بەرىلەدى.
2024-جىل راحات-ءبي ءابدىساعيننىڭ شىعارماشىلىق مانسابىنداعى ايتۋلى جىل بولدى. اقپان ايىندا ول ۇلى بريتانيانىڭ ءتورت سوبورىندا The Bruce وپەراسىنىڭ الەمدىك پرەمەراسىن ۇسىندى. بۇل وپەرا - راحات-ءبيدىڭ «بولاشاق» باعدارلاماسى بويىنشا شوتلانديانىڭ كورولدىك كونسەرۆاتورياسى مەن سەنت-ەندريۋس ۋنيۆەرسيتەتىندەگى دوكتورلىق زەرتتەۋىنىڭ ماڭىزدى بولىگى سانالادى.
سونىمەن قاتار، راحات-ءبيدىڭ «كۆانتتىق مەحانيكا جانە اۆانگاردتىق مۋزىكا» اتتى كىتابى نەمىستىڭ بەدەلدى Springer باسپاسىنان جارىق كوردى. فيزيكا مەن ەكسپەريمەنتالدى مۋزىكانىڭ توعىسقان جەرىندەگى بۇل بىرەگەي زەرتتەۋ عىلىمي جانە مۋزىكالىق ورتادا ۇلكەن قىزىعۋشىلىق تۋدىردى. اۆتور كىتابىن نيدەرلاند پەن گەرمانيانىڭ جەتەكشى ۋنيۆەرسيتەتتەرىندە، سونىڭ ىشىندە گەيدەلبەرگ پەن امستەردامدا تانىستىردى. بۇدان بولەك، كىتاپ ۇلى بريتانيانىڭ ەڭ تانىمال جانە ءىرى كىتاپ دۇكەندەرىنىڭ ءبىرى - وكسفوردتاعى باستى كىتاپ دۇكەنىنىڭ سورەلەرىنە قويىلدى.
«ماتەماتيكا، فيزيكا جانە مۋزىكانىڭ اراسىنداعى تەرەڭ بايلانىستى كورسەتە العانىما قۋانىشتىمىن. بۇل ونەر مەن عىلىمداعى جاڭا يدەيالارعا شابىت بەرەدى»، - دەدى كومپوزيتور تانىستىرۋ بارىسىندا.
ايتا كەتەيىك، راحات-ءبي ءابدىساعين - ەۋروپا، ازيا جانە امەريكاداعى ايگىلى كونسەرت زالدارىندا ورىندالاتىن 150 دەن استام مۋزىكالىق شىعارمالاردىڭ اۆتورى.
بۇعان دەيىن قازاق ۇلتتىق حورەوگرافيا اكادەمياسىنىڭ ستۋدەنتتەرى حالىقارالىق بايقاۋدا جەڭىسكە جەتكەنىن جازدىق.
