العاش رەت 10 جىلدا الەۋمەتتىك ماڭىزى بار ازىق-تۇلىك باعاسىنىڭ ءوسۋى باياۋلادى

استانا. KAZINFORM — جىل باسىنان بەرى الەۋمەتتىك ماڭىزى بار ازىق-تۇلىك تاۋارلارىنىڭ ورتاشا باعا يندەكسى 1,3 پايىزدى قۇراپ، سوڭعى 10 جىلداعى ەڭ تومەنگى كورسەتكىشكە جەتتى، دەپ حابارلايدى ساۋدا جانە ينتەگراتسيا مينيسترلىگى.

مۇنداي مالىمەتتەر 29-جەلتوقسان كۇنى الەۋمەتتىك ماڭىزى بار تاۋارلار باعاسىن تۇراقتاندىرۋ ماسەلەلەرى بويىنشا ۆيتسە-پرەمەر - ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن جيىندا ايتىلدى.

ورتاشا باعا يندەكسى تومەندەگەن الەۋمەتتىك ماڭىزى بار ازىق-تۇلىك تاۋارلارىنىڭ ىشىندە قاراقۇمىق جارماسى (35,0- پايىز)، ءسابىز (9,2- پايىز)، كۇرىش (8,2- پايىز)، ۇن (6,6- پايىز)، قانت (3,3- پايىز)، قىرىققابات (0,8- پايىز) جانە كۇنباعىس مايى (0,4- پايىز) بار. بيىلعى جىلى ناتيجەلى جۇمىس اتقارىپ، باعا يندەكسى 4 وڭىردە تومەندەدى. ولار — تۇركىستان وبلىسى (2,8 پايىز)، ۇلىتاۋ وبلىسى (2,8 پايىز)، استانا قالاسى (1,5 پايىز) جانە قىزىلوردا وبلىسى (0,6 پايىز).

ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا اتاپ وتكەندەي، باعاعا مەملەكەتتىك باقىلاۋ جۇرگىزۋ قۇزىرەتى مينيسترلىككە بەرىلگەننەن بەرى اكىمشىلىك شارالاردىڭ قولدانىلۋى بىلتىرعى جىلمەن سالىستىرعاندا 5 ەسەگە ارتقان. مەملەكەتتىك باقىلاۋ كۇشەيتىلىپ، وڭىرلىك كوميسسيالاردىڭ جۇمىسى ەلەكتروندى شوت-فاكتۋرالاردى تالداۋ ارقىلى جاقسارتىلدى.

— وڭىرلىك كوميسسيالاردىڭ 1,4 مىڭنان استام وتىرىسى ءوتىپ، 1441 زاڭبۇزۋشىلىق انىقتالدى. 9,2 مىڭ تاۋار جەتكىزۋ تىزبەگى تالدانىپ، 3,7 مىڭنان استام زاڭ بۇزۋ تاۋەكەلى انىقتالدى. 2025-جىلدىڭ 1-قاڭتارىنان باستاپ ساۋدا ۇستەمەسىن اسىرعانى ءۇشىن اكىمشىلىك جاۋاپكەرشىلىكتى كۇشەيتۋ جۇمىستارى جوسپارلانۋدا. بۇل قاتاڭداتۋدا ەسكەرتۋ ورنىنا ساۋدا سۋبەكتىسىنىڭ كاتەگورياسىنا بايلانىستى 5 تەن 150 ا ە ك- كە دەيىن اكىمشىلىك ايىپپۇل سالۋ قاراستىرىلعان، — دەپ اتاپ ءوتتى ءبىرىنشى ۆيتسە-مينيستر.

سونىمەن قاتار، وڭىرلەردە تۇراقتاندىرۋ قورلارىنداعى كوكونىستەردى ساتۋ جالعاسىپ جاتىر. اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ مالىمەتىنشە، كولەمى 159,6 مىڭ توننا كولەمدە قالىپتاسقان تۇراقتاندىرۋ قورىنداعى 19,5 مىڭ توننا كوكونىس ساتىلعان، قوردا 140 مىڭ توننانى كوكونىس بار. ونىڭ ىشىندە 10,8 مىڭ توننا كارتوپ، 2,9 مىڭ توننا ءسابىز، 3,2 مىڭ توننا پياز جانە 2,5 مىڭ توننا قىرىققابات ساتىلدى.

بۇعان دەيىن حابارلاعانىمىزداي، وتكەن دەمالىس كۇندەرى وڭىرلەردە 20 دان استام ازىق-تۇلىك ونىمدەرىنىڭ جارمەڭكەسى ءوتتى.