الاياقتىقتىڭ جاڭا ءتۇرى پايدا بولدى

سولتۇستىك قازاقستان وبلىسىندا Telegram جانە WhatsApp مەسسەندجەرلەرىندەگى اككاۋنتتاردى بۇزىپ، ازاماتتاردىڭ اتىنان اقشا سۇرايتىن الاياقتىق سحەماعا قاتىستى 14 دەرەك تىركەلدى. پوليتسيا تۇرعىنداردى بەيتانىس سىلتەمەلەرگە وتپەۋگە جانە اقشا اۋدارماس بۇرىن اقپاراتتى تەكسەرۋگە شاقىرادى.

سوڭعى ەكى اپتادا سولتۇستىك قازاقستان وبلىسىنىڭ تۇرعىندارىنا Telegram ارقىلى تانىستارىنىڭ اتىنان كۇماندى حابارلامالار كەلە باستاعان. حابارلامالاردا «ساشاعا داۋىس بەرشى» دەگەن ءوتىنىش جازىلىپ، بەلگىلى ءبىر بايقاۋعا قاتىسىپ جاتقان قىزعا داۋىس بەرۋگە ارنالعان سىلتەمە قوسا جىبەرىلەدى. ەسىم ءارتۇرلى بولۋى مۇمكىن.

الايدا بۇل - ازاماتتاردىڭ مەسسەندجەردەگى اككاۋنتتارىن يەمدەنۋگە باعىتتالعان الاياقتىق تاسىلدەردىڭ ءبىرى. جىبەرىلگەن سىلتەمەگە وتكەن جاعدايدا، اككاۋنتقا الاياقتاردىڭ قول جەتكىزۋ قاۋپى بار.

اككاۋنتتى باقىلاۋىنا العاننان كەيىن الاياقتار ونىڭ يەسىنىڭ اتىنان كونتاكتىلەرىنە حابارلاما تاراتىپ، اقشا سۇرايدى. ماسەلەن، «80 مىڭ تەڭگە جىبەرشى، كەشكە قايتارامىن» دەگەن مازمۇنداعى وتىنىشتەر جىبەرىلەدى. اقشا اۋدارۋعا دايىن ەكەنىن بىلدىرگەن نەمەسە ءمان-جايدى سۇراعان ادامدارعا قاراجاتتىڭ شۇعىل قاجەت ەكەنىن ايتىپ، وزگە ەسەپشوتقا اقشا اۋدارۋدى ۇسىنادى.

بۇل رەتتە اككاۋنتتىڭ شىنايى يەسى مەسسەندجەرگە كىرە الماي قالۋى مۇمكىن. ال ونىڭ اتىنان حات الماسىپ وتىرعان الاياقتىڭ ارەكەتىنەن حابارسىز قالادى.

س ق و پوليتسيا دەپارتامەنتى باستىعىنىڭ ءبىرىنشى ورىنباسارى الىبەك قۇجاحمەتوۆتىڭ ايتۋىنشا، وبلىستا وسىنداي سحەما بويىنشا جاسالعان الاياقتىقتىڭ 14 دەرەگى تىركەلگەن.

- كەز كەلگەن ازامات وسىنداي قاۋىپكە ۇشىراۋى مۇمكىن. ونىڭ ىشىندە كەڭىنەن قولدانىلاتىن WhatsApp تا بار. ادامعا قانشالىقتى سەنسەڭىز دە، ول سىلتەمە جىبەرسە، ادەتتەگى تەلەفون قوڭىراۋى ارقىلى حابارلاسىپ، مۇنداي حابارلامانى شىنىمەن ءوزى جىبەرگەن- جىبەرمەگەنىن انىقتاڭىز، - دەپ ەسكەرتتى الىبەك قۇجاحمەتوۆ.

سونىمەن قاتار پوليتسەيلەر فوتوسۋرەتكە قاتىستى حابارلامالارعا دا ساقتىقپەن قاراۋعا كەڭەس بەرەدى. ماسەلەن، «مىنا سۋرەتتەگى سەن ەمەسسىڭ بە؟ مۇنى قاشان ءتۇسىردىڭ؟» دەگەن ماتىنمەن بىرگە سىلتەمە كەلسە، ونى اشۋعا اسىقپاعان ءجون. مۇنداي سىلتەمەلەر ارقىلى تەلەفونعا زياندى باعدارلامالار ورناتىلۋى مۇمكىن.

پوليتسيا تۇرعىندارعا مىناداي قاراپايىم قاۋىپسىزدىك شارالارىن ساقتاۋدى ۇسىنادى:

- كۇماندى حابارلامالارداعى سىلتەمەلەرگە وتپەڭىز؛

- تانىسىڭىزدان اقشا اۋدارۋدى سۇراعان حابارلاما كەلسە، وعان تەلەفون ارقىلى تىكەلەي حابارلاسىپ، ءوتىنىشتىڭ راس-وتىرىگىن انىقتاڭىز؛

- مەسسەندجەرگە كەلگەن اقپاراتتى بىردەن شىندىق دەپ قابىلداماي، ونىڭ دۇرىستىعىن تەكسەرىڭىز؛

- اككاۋنتىڭىزعا بوتەن ادامنىڭ قول جەتكىزگەنىن بايقاساڭىز، ونى قورعاۋ ءۇشىن شۇعىل شارالار قابىلداڭىز.

ينتەرنەتتەگى الاياقتىقتان ساقتانۋدىڭ باستى جولى - كۇماندى سىلتەمەلەردى اشپاۋ جانە كەز كەلگەن اقشا اۋدارىمىنىڭ الدىندا اقپاراتتى مۇقيات تەكسەرۋ.