الاياقتىقتان قورعاۋ: رەسمي ۇيىمدار قوڭىراۋى تاڭبالاناتىن بولدى

بۇگىن ءماجىلىس تەلەكوممۋنيكاتسيالار نارىعىن جانە دەرەكتەردى وڭدەۋ ورتالىقتارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى. زاڭ جوباسى 116 تۇزەتۋدەن تۇرادى جانە بايلانىس قىزمەتتەرىنىڭ ساپاسى مەن قولجەتىمدىگىن ارتتىرۋ، تەلەكوممۋنيكاتسيا ينفراقۇرىلىمىن دامىتۋ، بايلانىس جەلىلەرىندەگى الاياقتىقپەن كۇرەسۋ باعىتتارىن قامتيدى.

زاڭ جوباسىنداعى ءۇشىنشى بلوك تەلەكوم-ينفراقۇرىلىمدى قورعاۋعا جانە الاياقتىقپەن كۇرەسكە ارنالعان.

- داتا-سەنترلەردى ستراتەگيالىق نىساندار قاتارىنا ەنگىزۋ جانە ولاردى سالۋ نەمەسە ىسكە قوسۋ كەزىندە حابارلاۋ ءتارتىبىن ەنگىزۋ ۇسىنىلادى. بۇل باقىلاۋدى كۇشەيتىپ، دەرەكتەر قاۋىپسىزدىگىن جانە ينفراقۇرىلىمنىڭ تۇراقتىلىعىن ارتتىرادى. ينتەرنەت جەلىسىنە جانە IP- تەلەفونياعا قول جەتكىزۋ قىزمەتتەرىن ليتسەنزيالاۋ تالاپتارى جاڭارتىلىپ جاتىر، - دەدى پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ جاڭا زاڭ تانىستىرىلىمىندا.

ازاماتتاردى تەلەفون الاياقتىعىنان قورعاۋ ءۇشىن زاڭدى تۇلعالاردان قوڭىراۋلار تاڭبالاناتىن بولادى. بۇل ابونەنتتەرگە رەسمي قوڭىراۋلاردى كۇدىكتىلەردەن اجىراتۋعا مۇمكىندىك بەرەدى.

- ابونەنتتىك ءنومىر مەن ۇيالى تەلەفونداردى جاقىن تۋىستارىنان باسقا ءۇشىنشى تۇلعالارعا بەرۋگە تىيىم سالىنادى. بيومەتريالىق اۋتەنتيفيكاتسيا بويىنشا نورمالار سيفرلىق كودەكسكە سايكەس كەلتىرىلىپ جاتىر. سونداي-اق بايلانىس قۇرالدارىن ۆەريفيكاتسيالاۋ ارقىلى تىركەۋ ءراسىمىن جەتىلدىرۋ كوزدەلگەن. بۇل زاڭسىز اكەلىنگەن قۇرالداردى پايدالانۋدى ازايتادى، IMEI ءدى اۋىستىرۋ ارقىلى جاسالاتىن الاياقتىق تاۋەكەلدەرىن تومەندەتەدى،-دەدى سالا ءمينيسترى.

ايتا كەتەيىك، قازاقستاندا پويىزدار مەن ۇشاقتاردا ينتەرنەت قولجەتىمدى بولادى.

سونىمەن بىرگە، eGov،e-Otinish قىزمەتتەرى مەن Aitu مەسسەندجەرى ءتاريفسىز قولجەتىمدى بولماق.