الاياقتىق جاسادى دەپ ايىپتالعان 620 قىتاي ازاماتى ەلىنە قايتارىلدى
استانا. KAZINFORM - قىتاي، ميانما جانە تايلاند ەلدەرىنىڭ قۇقىق قورعاۋ ورگاندارى ترانسشەكارالىق تەلەكوممۋنيكاتسيالىق الاياقتىققا قارسى بىرلەسكەن وپەراتسيالاردى كۇشەيتىپ جاتىر.
ناتيجەسىندە جىل باسىنان بەرى ترانسشەكارالىق قىلمىستىق توپتىڭ مۇشەسى دەگەن كۇدىكپەن ۇستالعان 620 قىتاي ازاماتى ەلىنە قايتارىلدى. بۇل تۋرالى Lianhe Zaobao باسىلىمى حابارلادى.
28-اقپان كۇنى تايلاندتىڭ بانگكوك قالاسىندا ءۇش ەلدىڭ وكىلدەرى ترانسشەكارالىق تەلەكوممۋنيكاتسيالىق الاياقتىققا قارسى كۇرەستى ۇيلەستىرۋ جونىندە مينيسترلىك دەڭگەيىندە كەزدەسۋ وتكىزدى. كەزدەسۋدە تاراپتار بىرلەسكەن كۇرەستى ودان سايىن كۇشەيتۋ جايلى پىكىر الماسىپ، ءبىرقاتار ۋاعدالاستىققا قول جەتكىزدى.
باسىلىمنىڭ جازۋىنشا، كەزدەسۋ ترانسشەكارالىق الاياقتىققا قارسى كۇرەس بويىنشا قىتاي، ميانما جانە تايلاند اراسىنداعى ىنتىماقتاستىقتىڭ ماڭىزدى ءارى كەزەڭدىك ناتيجەگە قول جەتكىزگەنىن كورسەتتى. كەزدەسۋدە تاراپتار بىرلەسكەن ءىس-قيمىلدى ۇدايى جالعاستىرۋ، تۇراقتى ۇيلەستىرۋ تەتىكتەرىن ورناتۋ، اقپارات الماسۋدى كۇشەيتۋ، كۇدىكتىلەردى ەلىنە قايتارۋ راسىمدەرىن جەتىلدىرۋ ماسەلەسى بويىنشا كەلىسىمگە كەلدى.
بەلگىلى بولعانداي، سوڭعى ۋاقىتتا ءۇش ەلدىڭ ءتيىستى ۆەدومستۆالارى ۇيىمداستىرعان بىرلەسكەن وپەراتسيالاردىڭ ناتيجەسىندە، ميانمانىڭ مياۆادي ايماعىندا قولعا تۇسكەن 620 قىتاي ازاماتى ەلىنە قايتارىلعان.
سوڭعى جىلدارى ميانمانىڭ شەكارالىق اۋداندارىندا تەلەكوممۋنيكاتسيالىق الاياقتىق ءورشىپ تۇر. الاياقتىقپەن اينالىساتىن قىلمىستىق توپتار شەتەل ازاماتتارىن «جالاقىسى جوعارى جۇمىس بار» دەپ شىرعالاپ، ايماققا شاقىرىپ العاننان كەيىن كەپىلگە الىپ، ينتەرنەت ارقىلى الاياقتىق جاساۋعا ماجبۇرلەيدى.
قىتاي تاراپىنان جاسالعان قىسىمنىڭ كۇشەيۋىنە بايلانىستى، جىل باسىنان بەرى ميانما بيلىگى الاياقتاردىڭ ءبىرقاتار «اپانىن» جويدى. ارنايى وپەراتسيالار بارىسىندا 20 عا جۋىق ەلدىڭ شامامەن 7000 ازاماتى قۇلدىقتان بوساتىلدى.
وسىعان دەيىن قازاقستانعا ينتەرنەت-الاياقتىق جاساۋ ءۇشىن كەلگەن شەتەلدىكتىڭ تۇتقىندالعانى تۋرالى جازدىق.
