الاياقتاردان ساق بولىڭىز. ۇلتتىق بانك ەل ازاماتتارىنا ۇندەۋ جاسادى
ۇلتتىق بانك حالىققا «ساقتاندىرۋ جاعدايلارىن» پايدالاناتىن الاياقتاردىڭ جاڭا سحەمالارى پايدا بولعانىن ەسكەرتتى، دەپ حابارلايدى ۆەدومستۆونىڭ باسپا ءسوز قىزمەتى.
ۇلتتىق بانك جەكە تۇلعالارعا قىزمەت كورسەتپەيتىنىن، سونداي- اق ازاماتتاردىڭ قارجى قۇرالدارىن ساقتاندىرۋمەن اينالىسپايتىنىن رەسمي تۇردە مالىمدەدى.
وسى تۇستا ۇلتتىق بانك سوت ءىسى مەن شەشىمدەرى اياسىندا جاسالعان «جەكە سوت ورىنداۋشىلارىنىڭ» جالعان قۇجاتىن ۇسىنۋ ارقىلى الدايتىن الاياقتاردىڭ جيىلەپ كەتكەنىن ەسكەرتتى.
«قاراجات جىمقىرۋدى كوزدەيتىن قاسكويلەر وزدەرىن جەكە سوت ورىنداۋشىسى رەتىندە تانىستىرىپ، ازاماتتارعا جالعان قۇجاتتار جىبەرەدى. وندا ازاماتتارعا تيەسىلى ۇلتتىق بانكتە «جەكە تۇلعالاردىڭ اشىق جانە ساقتاندىرىلعان شوتى» بار دەپ الدايدى. سول ءۇشىن جابىرلەنۋشى تاراپ رەتىندە ازاماتتارعا اقشالاي تولەمدەر مەن وتەماقىلار تولەنەدى دەگەن سىلتاۋمەن كەيىن «ۇلتتىق بانكتىڭ قاراجاتىنان» وتەلەدى دەپ ساقتاندىرۋ جارناسىن ەنگىزۋ كەرەك ەكەنىن العا تارتادى. ازاماتتاردى سەندىرۋ ءۇشىن مەملەكەتتىك ورگاندارداعى «ۋاكىلەتتى تۇلعالاردىڭ» نەمەسە جەكە سوت ورىنداۋشىسىنىڭ قولى مەن اتى- ءجونى جازىلعان جانە ءمور باسىلعان جالعان قۇجاتتاردى كورسەتەدى. مۇنداي «راستاۋشى قۇجاتتار» ازاماتتاردى ءۇشىنشى تۇلعاعا اقشا اۋدارۋعا سەندىرۋ ءۇشىن كورسەتىلەدى. ۇلتتىق بانك جەكە تۇلعالاردىڭ شوتىنا قىزمەت كورسەتپەيتىنىن، ازاماتتاردىڭ قارجى قۇرالدارىن ساقتاندىرۋمەن اينالىسپايتىنىن، سونداي-اق حالىقپەن اقشالاي ەسەپ ايىرىسپايتىنىن ەسكە سالامىز»،دەلىنگەن حابارلامادا.
الاياقتاردىڭ ارباۋىنا تۇسكەن ازاماتتارعا قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنۋگە كەڭەس بەرىلدى.
