الاياقتارعا اقشا اۋدارىپ قويعاننان كەيىن پوليتسياعا جۇگىنۋدىڭ ءمانى بار ما
استانا. KAZINFORM - استانا قالاسى سارىارقا اۋدانى پوليتسيا باسقارماسى باستىعىنىڭ ورىنباسارى جاسۇلان جاقاي وڭىرلىك كوممۋنيكاتسيالار قىزمەتىندە وتكەن بريفينگىدە ينتەرنەت الاياقتىقپەن كۇرەس تۋرالى مالىمەت بەردى.
«الاياقتارعا اقشا اۋدارىپ قويعان بولسام، پوليتسياعا جۇگىنۋدىڭ ءمانى بار ما؟» - دەپ سۇرادى ينتەرنەت قولدانۋشى.
پوليتسيا وكىلىنىڭ ايتۋىنشا، كەز كەلگەن زاڭسىزدىق بويىنشا پوليتسياعا جۇگىنۋدىڭ ءمانى بار.
«مىندەتتى تۇردە پوليتسياعا جۇگىنۋ كەرەك. ول ارىز بويىنشا قىلمىستىق ءىس قوزعالىپ، تەرگەۋ جۇرگىزىلەدى، قىلمىستىق ءىس اشىلادى. تەرگەۋ بارىسىندا زارداپ شەگۋشى مەن كۇدىكتى اراسىنداعى ءوزارا كەلىسىم نەگىزىندە كەلگەن شىعىندى ءوندىرىپ الۋعا بولادى. ال شىعىندى ءوندىرىپ الۋ مۇمكىندىگى بولماسا، زارداپ شەگۋشى ازاماتتىق سوتقا جۇگىنەدى. قالاي بولعاندا دا شىعىن وندىرىلەدى»، - دەدى جاسۇلان جاقاي.
اۆتور
ەسىمجان ناقتىباي
