الاياقتارعا اۋدارىلعان اقشانى قالاي قايتارىپ الۋعا بولادى

استانا. KAZINFORM - الماتى قالاسىنىڭ پروكۋراتۋراسى دروپپەرلەردەن كەلتىرىلگەن زالالدى قالاي وتەۋگە بولاتىنى جونىندە نۇسقاۋلىق جاريالاعان.

«دروپپەر» - بۇل الاياقتار اقشا الۋ ءۇشىن پايدالاناتىن ادام. ادەتتە، بانك شوتتارى، كارتوچكالار ارقىلى اۋدارىم جاسالادى نەمەسە ۇرلانعان قاراجات قولما- قول اقشاعا اينالادى.

- ءوندىرىپ الۋدىڭ مۇنداي مۇمكىندىگى نەگىزسىز بايىتۋ كەزىندە قاراجات پەن مۇلىكتى قايتارۋ مىندەتىن كوزدەيتىن ازاماتتىق كودەكسىنىڭ 953-بابىمەن رەگلامەنتتەلگەن، - دەلىنگەن الماتى قالاسىنىڭ پروكۋراتۋراسى حابارلاماسىندا.

ناۋرىزباي اۋداندىق سوتىنىڭ شەشىمىمەن جابىرلەنۋشىنىڭ «دروپپەرلەردەن» 3 ميلليون تەڭگە مولشەرىندە زالال سوماسىن ءوندىرىپ الۋ تۋرالى تالابى قاناعاتتاندىرىلدى.

تالاپ ارىز بەرۋ ءۇشىن مىناداي قۇجاتتار قاجەت:

- قىلمىستىق ءىستى س د ت ب-نە ەنگىزۋ تۋرالى باياناتتىڭ كوشىرمەسى؛

- جابىرلەنۋشىنى تانۋ تۋرالى قاۋلىنىڭ كوشىرمەسى؛

- بانكتەن ادامنىڭ شوتىنا اقشا قاراجاتىن اۋدارۋ تۋرالى جاۋاپ؛

- شوتىنا اقشالاي قاراجات تۇسكەن ادامنان جاۋاپ الۋ («دروپپەرلەر»).

ەگەر ءسىز ينتەرنەت- الاياقتىقتىڭ قۇربانى بولساڭىز، قوسىمشا سۇراقتار بويىنشا پروكۋراتۋرا ورگاندارىنا جۇگىنۋگە قۇقىعىڭىز بار. الماتى قالاسىنىڭ پروكۋراتۋراسى ازاماتتاردى مۇقيات بولۋعا جانە وزدەرىنىڭ بانكتىك كارتالارىنىڭ دەرەكتەرى مەن كىرۋ كودتارىن بوگدە ادامدارعا بەرمەۋگە شاقىرادى، - دەلىنگەن حابارلامادا.