الاياقتار ەلوردالىقتاردى 2 ميلليارد 600 ميلليون تەڭگەگە سان سوقتىردى
الاياقتار ەلوردا تۇرعىندارىنىڭ 2 ميلليارد 600 ميلليون تەڭگە قاراجاتىن الداپ العان. بۇل تۋرالى استانا قالالىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى، پوليتسيا پولكوۆنيگى داستان قاليەۆ ايتتى، دەپ حابارلايدى قازاقپارات ءتىلشىسى.

«بيىل استانا اۋماعىندا اقپاراتتىق تەحنولوگيالاردى پايدالانا وتىرىپ جاسالاتىن 3710 قىلمىستىق قۇقىق بۇزۋشىلىق تىركەلدى. بۇل رەتتە ازاماتتارعا كەلتىرىلگەن زالال 2 ميلليارد 600 ميلليون تەڭگەدەن اسادى. رەسپۋبليكالىق اۋقىمدا 15509 ينتەرنەت- الاياقتىق تىركەلگەن. ياعني، ءاربىر 4 ينتەرنەت- الاياقتىق استانا تۇرعىندارىنا قاتىستى جاسالادى. توناۋ، قاراقشىلىق سىندى ادەتتەگى قىلمىستار ەكىنشى ورىنعا سىرعىپ وتىر. بۇل باعىتتاعى قىلمىستاردىڭ تومەندەۋىنە ۇنەمى جۇرگىزىلەتىن جەدەل الدىن الۋ ءىس- شارالارى، زاماناۋي تەحنولوگيالار ەسەبىنەن تومەندەدى. الايدا، اقپاراتتىق تەحنولوگيالاردى پايدالانا وتىرىپ جاسالاتىن قىلمىستار جىلدان جىلعا ءورشىپ بارادى»، - دەدى ول استانا قالالىق كوممۋنيكاتسيالار قىزمەتىندەگى بريفينگتە.
ونىڭ اتاپ وتۋىنشە، الاياقتاردىڭ قولىنان زارداپ شەككەندەردىڭ ءبارى بىردەي قۇقىق قورعاۋ ورگاندارىنا جۇگىنبەيدى.
«ناقتى ساندار ايتىلعانداردان ەداۋىر كوپ جانە ستاتيستيكا قانداي ەكەنىن تەك بولجاۋعا بولادى. الاياقتار ءار ءتۇرلى جاستاعى ادامداردى الدايدى. ەگدە جاستاعى ادامدار كوبىنەسە جاڭا تەحنولوگيالارمەن تانىس ەمەس جانە از ساقتىق تانىتادى. ال جەڭىل اقشا ىزدەيتىن ادامدار ءوز جيناقتارىن سالۋ ارقىلى قىسقا مەرزىمدە تەز كوبەيتىپ الامىن دەپ سەنەدى»، - دەيدى داستان قالييەۆ.
داستان قاليەۆ ەلوردالىق پوليتسيا دەپارتامەنتى قالا اكىمدىگىمەن بىرلەسىپ، تۇراقتى نەگىزدە ينتەرنەت- الاياقتىقتى ازايتۋعا جانە حالىقتىڭ قارجىلىق ساۋاتتىلىعىن ارتتىرۋعا باعىتتالعان الدىن الۋ ءىس- شارالارىن جۇرگىزىپ جاتقانىن اتاپ ءوتتى.