الاياقتار كۋرەر بولىپ جاسىرىنۋدا: قازاقستاندىقتار نەدەن ساق بولۋى كەرەك؟

الدىمەن ازاماتتارعا كۋرەر نەمەسە پوشتا قىزمەتى اتىنان قوڭىراۋ شالىپ، سالەمدەمە كەلگەنىن حابارلايدى. جەتكىزۋدى راستاۋ ءۇشىن SMS-حابارلاماداعى كودتى سۇرايدى. الاياقتار ادامدى ادەيى اسىقتىرىپ، SMS-حابارلامانىڭ نەگىزگى مازمۇنىمەن مۇقيات تانىسۋعا مۇمكىندىك بەرمەيدى. ياعني، كۋرەر جىبەرىلەتىن زاتتى كۇتىپ تۇرعانىن، تەز جاۋاپ بەرمەسە الۋشى ءوز كەزەگىنەن ايىرىلىپ قالاتىنىن العا تارتادى. ال ەگەر تەلەفونداعى اڭگىمە ۇزىلەتىن بولسا، جەتكىزۋ قىزمەتىن قايتا راسىمدەۋگە تۋرا كەلەتىنىن ايتىپ اسىقتىرۋى مۇمكىن، - دەپ حابارلادى ۇلتتىق بانكتىڭ باسپا ءسوز قىزمەتى.

SMS-كودتى العاننان كەيىن الاياقتار كەلەسى ادىسكە كوشەدى. ول كەزدە ازاماتقا قوڭىراۋ شالعان ادام ءوزىن سيفرلىق ۇكىمەتتىڭ (eGov) وكىلى دەپ تانىستىرادى. اڭگىمە بارىسىندا ونىڭ ەسەپتىك جازباسى بۇزىلعانىن ايتىپ، الاياقتار جەكە دەرەكتەرىن كوشىرىپ نەمەسە قولدى قىلىپ جاتقان بولۋى مۇمكىن دەپ قاۋىپتەندىرەدى.

سەنىمگە كىرۋ ءۇشىن ازاماتتىڭ ءوزىن قورعاۋ ماقساتىندا «ستوپ-كرەديت» قىزمەتى قوسىلعانىن، ال جاعدايدىڭ ءوزى قۇقىق قورعاۋ ورگاندارىنىڭ نەمەسە «ۇلتتىق بانكتىڭ قاۋىپسىزدىك قىزمەتىنىڭ» باقىلاۋىندا ەكەنىن مالىمدەۋى مۇمكىن. ءارى قاراي قوڭىراۋ جەلىسى الاياقتىق سحەماعا قاتىساتىن باسقا ادامعا دا جالعاناتىن كەزدەر بولادى. مۇنداي قيتۇرقى ارەكەتتەردىڭ تۇپكى ماقساتى - قالاي دا ازاماتتىڭ اقشاسىنا يەلىك ەتۋ. وسىنداي سحەمالار ارقىلى الاياقتار ءوز قۇربانىنا پسيحولوگيالىق قىسىم كورسەتۋگە تىرىسادى. قاسكويلەر ەكەۋ ارا اڭگىمەنىڭ قۇپيالىلىعىن ساقتاۋ كەرەك دەگەن جەلەۋمەن تەلەفوندى ۇزبەۋگە، بولىپ جاتقان جاعداي تۋرالى باسقا ادامعا ايتپاۋعا ۇندەۋى مۇمكىن، - دەلىنگەن حابارلامادا.

ءتىپتى كەيبىر جاعدايلاردا ولار اقپاراتتى جاريا ەتكەن ادامعا قىلمىستىق جاۋاپكەرشىلىك كوزدەلگەنىن ايتىپ قورقىتادى. ال، ەگەر اڭگىمەنى ۇزەر بولسا، ونىڭ قاراجاتى مەن دەربەس دەرەكتەرىن قورعاۋعا باعىتتالعان پروتسەدۋرالاردىڭ ءبارى كۇشىن جويادى دەپ سەندىرەدى. مۇنداي قىسىم ازامات جاقىندارىنان، بانكتەن نەمەسە قۇقىق قورعاۋ ورگاندارىنان كەڭەس الماۋى ءۇشىن اينالاسىنان كومەك سۇراۋ مۇمكىندىگىن شەكتەۋگە باعىتتالادى.

ۇلتتىق بانك تەلەفونعا كەلگەن SMS- حابارلامانى مۇقيات وقۋعا، جىبەرۋشى تاراپتى تەكسەرۋگە جانە SMS-كودتى ەشكىمگە ايتپاۋعا كەڭەس بەرەدى. كۇماندى قوڭىراۋ تۇسكەن جاعدايدا اڭگىمەنى ءۇزىپ، ءتيىستى ۇيىمنىڭ رەسمي تەلەفون نومىرىنە ازاماتتىڭ ءوزى حابارلاسقانى دۇرىس.

ەسىڭىزدە بولسىن، ۇلتتىق بانكتىڭ قىزمەتكەرلەرى اۋديو/ۆيدەوقوڭىراۋ شالمايدى، جەكە تۇلعالاردىڭ شوتىنا قىزمەت كورسەتپەيدى، ينۆەستيتسيالىق پاي قورلارىنا نەمەسە وزگە دە قارجى ونىمدەرىنە ينۆەستيتسيا سالۋعا كەڭەس بەرمەيدى. سونداي- اق ۇلتتىق بانك اقشا قۇرالدارىن ساقتاندىرۋمەن اينالىسپايدى، بانك كارتاسىنىڭ ءپارولى مەن دەرەكتەمەلەرىن سۇراتپايدى جانە حالىقپەن اقشالاي ەسەپ ايىرىسپايدى، - دەيدى ۇلتتىق بانك.

الاياقتىق ارەكەتكە تاپ بولعان جاعدايدا قازاقستان رەسپۋبليكاسىنىڭ قۇقىق قورعاۋ ورگاندارىنا ءتيىستى ارىزبەن جۇگىنگەن دۇرىس.

سونداي-اق، قوسىمشا كەڭەس الۋ ءۇشىن 1477 قىسقا ءنومىرى ارقىلى ۇلتتىق بانكتىڭ بايلانىس ورتالىعىنا حابارلاسۋعا بولادى.