الماتىنىڭ قاي كوشەلەرىندە اۆتوتۇراق باعاسى 150 جانە 200 تەڭگە بولدى
الماتى. KAZINFORM - الماتىنىڭ كوممۋنالدىق اۆتوتۇراقتارىندا 4-قازاننان باستاپ جاڭا تاريفتەر قولدانىسقا ەنگىزىلدى.
جاڭا تارتىپكە سايكەس، كولىك قوزعالىسى سالىستىرمالى تۇردە تومەن ۋچاسكەلەردە تاريف بۇرىنعىداي ساعاتىنا 100 تەڭگە بولىپ قالدى. اۆتوتۇراقتارعا سۇرانىس ورتاشا اۋماقتاردا ساعاتىنا 150 تەڭگە بەلگىلەندى. ال تۇراق ورىندارى تاپشى ءارى كولىك قوزعالىسى جوعارى، سۇرانىس ەڭ كوپ ايماقتاردا تاريف ساعاتىنا 200 تەڭگە بولدى.
Kazinform اگەنتتىگىنىڭ ساۋالىنا جاۋاپ بەرگەن قالا اكىمدىگى باعاسى وزگەرگەن اۆتوتۇراق مەكەنجايلارىنىڭ ءتىزىمىن ۇسىندى. جاڭا تاريف بويىنشا ءبىر كوشەنىڭ بويىنداعى اۆتوتۇراقتا ءارتۇرلى باعا بولۋى مۇمكىن. ماسەلەن، اباي داڭعىلىندا گاگارين داڭعىلىنان روزىباكييەۆ كوشەسىنە دەيىنگى باعا 100 تەڭگە بولسا، اۋەزوۆ كوشەسىنەن گاگارين داڭعىلىنا دەيىن 150 تەڭگە. ال نازاربايەۆ داڭعىلىنان دوستىق داڭعىلىنا دەيىن اباي داڭعىلىنىڭ بويىندا كولىكتى قالدىرۋ ءۇشىن ەندى ساعاتىنا 200 تەڭگە تولەۋ قاجەت.
تاريف تەك قالا ورتالىعىنداعى اۆتوتۇراقتاردا وزگەرمەگەن. كولىك جۇكتەمەسىنە قاراي قالانىڭ شەتكى تۇستارىنداعى دا باعا اۋىسقان. مەگاپوليستىڭ باتىس بولىگىندەگى مومىش ۇلى كوشەسىندە جۇبانوۆ كوشەسىنەن تولە بي كوشەسىنە دەيىن 100 تەڭگە، مارعۇلان كوشەسىنەن ۇلىقبەك داڭعىلىنا دەيىن 200 تەڭگە بەلگىلەنگەن.
سونداي-اق قالاداعى بازارلار مەن ولاردىڭ جانىنداعى تۇراقتاردىڭ بارلىعىندا دەرلىك كوممۋنالدىق اۆتوتۇراق باعاسى كوتەرىلگەن. اسىرەسە، حالىق اراسىندا «باراحولكا» اتىمەن بازارلاردى اتاپ وتۋگە بولادى. مۇندا «ادەم» ساۋدا ورتالىعىنان «الاتاۋ 2» بازارىنا دەيىن تۇراق قۇنى 150 تەڭگە بولىپ بەكىتىلدى.
جاڭا تاريفتەر بويىنشا تولىق ءتىزىمدى ماقالادا ۇسىنىلعان ينفوگرافيكادان كورە الاسىزدار.
ەسكە سالايىق، بۇعان دەيىن الماتىدا اۆتوتۇراق تاريفىنىڭ وزگەرۋىنە بايلانىستى جۇرگىزۋشىلەر نەنى ءبىلۋى كەرەك ەكەنىن جازعانبىز.
